Il dumber da cunfinaris en Grischun è creschì il terz quartal da quest onn cumpareglià cun la medema perioda da l'onn avant. En tut han uschia 6'473 persunas lavurà il terz quartal dal 2018 en Grischun e gì il domicil en l'exteriur cunfinant. Avant in onn eran quai anc 6125 persunas. Quai correspunda ad in augment per 5,7%. Dapi l'entschatta dal 2017 è il dumber schizunt creschì per radund 500 persunas.
S'augmentà è surtut il dumber da persunas da l'Italia che vegnan en Grischun a lavurar: La fin da settember eran quai 5'857 persunas. Quai èn passa 300 dapli ch'in onn avant. Mo levet creschì è il dumber dad Austriacs (da 255 sin 261 persunas) e da persunas dal Principadi da Lichtenstein (da 22 persunas sin 29).
Damain cunfinaris en l'entira Svizra
Cuntrari al svilup en il Grischun èn en l'entira Svizra per l’emprima giada dapi 20 onns damain cunfinaris vegnids registrads il terz quartal da quest onn – cumpareglià cun l’onn avant. La fin da settember èn uschia vegnids registrads 312'000 pendularis da lavur. Quai èn 0,8% damain che l'onn avant. L'ultima giada che il dumber era sa sbassà, è stà il 1998. Quella giada era il dumber ì enavos per 0,7%.
Il pli ferm è il dumber da cunfinaris sa reducì en il Tessin, numnadamain per 4,1%. En la Svizra dal Nordvest è il dumber ì enavos per 2,4%, fertant che il dumber en la regiun dal Lai da Genevra – la pli impurtanta regiun da cunfinaris – è stagnà tar stgars 115'000 persunas.
RR novitads 16:00