L’augment marcant da dischoccupaziun da 0,5% è cunzunt in effect da la fin da la stagiun turistica da stad ed atun, scriva l’Uffizi per industria, mastergn e lavur.
850 persunas en gastronomia èn senza lavur
Il pli aut dumber da dischoccupads è da chattar tar la hotellaria (850), suandà da l’industria da construcziun (143), dal commerzi en detagl (138) e dal sectur da sanadad e dal socialesser (105). Plinavant han ins dumbrà 4 persunas dischoccupadas da lunga durada dapli per l’october.
Damain plazzas libras sin martgà svizzer
La fin d’october eran en Svizra radund 141’000 persunas registradas sco dischoccupadas. Quai è in augment da circa 8’800 persunas, u 6,7% dapli dischoccupads che avant in onn.
A medem mument è il dumber da plazzas da lavur libras sa reducì. Tar ils centers regiunals per intermediaziun da lavur datti l’october uschia 17% damain plazzas libras (ca. 9’500) che durant il settember.
Dapli giuvenils han chattà lavur
Percunter è la dischoccupaziun tar ils giuvens tranter 15 e 24 onns pli pitschna ch’il settember. Ella è sa reducida per 4%. Uschia èn uss radund 20’000 giuvenils senza lavur. Cumpareglia cun l’onn passà munta quai dentant in augment da bunamain 6%.
RR novitads 08:00 / 09:00