Propi ina statistica na fa nagina da las vischnancas dumandadas, tenor il sentiment dettia quai dentant propi pli savens ferms urizis e quels chaschunan lura donns vi da vias da viandar u vias da guaud.
Per exempel er a Cuira. Là ha quai dà l'avust passà in ferm urizi cun fin 50 mm plievgia durant mo in'ura. En uschè curt temp na po il terren betg prender si l'aua.
Donns da 100'000 francs
Entaifer mo in'ura ha quest urizi chaschunà en la chapitala donns da passà 100'000 francs, uschia Toni Jäger, il manader dals servetschs forestals da la citad da Cuira. Tranter auter èn vias da guaud vegnidas donnegiadas e tschiffaglera èn vegnids emplenids cun bovas.
Dapli urizis en avegnir
En avegnir èsi tenor experts da quintar cun dapli plievgias grondas, uschia Hanspeter Lötscher da l'Uffizi per natira ed ambient dal chantun. I na dettia per il mument anc naginas statisticas che conferman quai. Experts sajan dentant da l'avis che la midada dal clima mida er l'aura.