Siglir tar il cuntegn
Inhalt

Chantun Dapli dunnas han tschertgà protecziun

En egl croda surtut, che dapli dunnas sur 50 onns han tschertgà protecziun en la chasa da dunnas grischuna.

Ina dunna che prelegia a dus uffants in'istorgia.
Legenda: Er quest onn han dapli dunnas tschertgà protecziun en la chasa da dunnas. Keystone

L'onn passà han en tut 32 dunnas e 29 uffants tschertgà protecziun e dimora en la chasa da dunnas grischuna. Quai è danovamain dapli che l'onn avant. En media è ina dunna stada 18 dis en la chasa. Quai è radund in'emna pli pauc ch'anc avant intgins onns.

Tge che fa surstar, è l'augment da dunnas pli veglias, scriva la manadra da la chasa Bettina Melchior en il rapport. Bunamain mintga 5avla dunna era sur 50 onns veglia, duas sur 61 onns ed ina schizunt sur 70 onns. Cunquai che la chasa da dunnas ha survegnì l'onn passà damain donaziuns, serra il quint annual cun ina perdita da radund 100'000 francs.

Positiv che dunnas gughegian

Tenor Marina Cadonau, da la chasa da dunnas n'èsi dentant betg negativ che pli bleras dunnas han tschertgà suttetg. Ella crai ch'i saja positiv che las dunnas gughegian da prender encunter agid e da midar insatge en lur vita.

Las dunnas èn forsa vegnidas pli curaschusas e gughegian da far il pass da bandunar l'um - e la societad accepta quai er pli fitg ch'avant decennis.
Autur: Marina CadonauChasa da dunnas Grischun

Ins na possia dentant betg discurrer d'in trend, mo perquai che dapli dunnas pli veglias han tschertgà l'agid l'onn passà. Cunquai che la chasa da dunnas dal Grischun è fitg pitschna e mo trais dunnas e lur uffants han plaz, pon mo paucas dunnas d'ina vegliadetgna influenzar l'entira statistica, uschia Marina Cadonau. I giaja adina in zic si e giu, tscherts onns dettia quai pli bleras dunnas giuvnas, auters onns pli veglias.

RR actualitad 17:00