Radund 1'600 scolars e scolaras frequentan il davos onn da scola en il Grischun. Bun in terz sa decida per il gimnasi, ina scola cuntinuanta u in onn da tscherna d'emprendissadi. En il Grischun stattan 1'600 plazzas d'emprendissadi a disposiziun, e tuttina na chattan betg tut ils scolars l'emprendissadi da siemi.
Situaziun actuala
Quants scolars che tschertgan anc ina plazza d'emprendissadi na san ins betg, di Justina Simeon Cathomas, la manadra da la cussegliaziun da professiun, studi e carriera. Il mument èn dentant anc 500 plazzas libras en il Grischun. Il problem è ch'i na dat betg avunda plazzas en las spartas ch'ils giuvens e las giuvnas avessan gugent.
Ils favurits
Sin l'emprima plazza è sco adina l'emprendissadi mercantil, malgrà ch'i è difficil da chattar ina plazza suenter l'emprendissadi, di Justina Simeon Cathomas. Era clamadas creativas, cun uffants, cun animals èn fitg tschertgadas, ì dat dentant mo paucas plazzas d'emprendissadi.
Mancanza d'emprendists
Da memia plazzas datti en las branschas da bajegiar, en l'industria, en la vendita ed en la gastronomia. Na lessan ils giuvens e las giuvnas betg pli far tschuf lur mauns? Na, di Justina Simeon Cathomas. I dettia simplamain memia bleras plazzas en questas branschas ed adina pli e pli paucs scolars e scolaras. E cun il temp maina la mancanza da forzas giuvnas tar tschertas branschas tar ina mancanza da spezialists. Perquai vegn empruvà da far pli attractiv tschertas plazzas, cun porscher scolaziun supplementara suenter l'emprendissadi.