Davent dal november access liber sin documents uffizials

La lescha chantunala da transparenza entra en vigur il prim da november 2016; damai ch'i n'ha betg dà in referendum encunter. La nova lescha era vegnida deliberada dal Cussegl grond en la sessiun d'avrigl.

dunna giuvna stat avant ina stgaffa cun grondas chaschuttas Bild in Lightbox öffnen.

Legenda da maletgs: L'invista publica en documents uffizials vegn reglada en la nova lescha da transparenza. Keystone

Il princip da transparenza conceda a mintga persuna – independentamain da la vegliadetgna, da la naziunalitad e dal domicil – in dretg da survegnir access a documents uffizials. L'access po vegnir refusà mo, sche las leschas prevesan quai u sche interess publics u privats predominants prescrivan da tegnair secret ils documents.

Il dretg vala sulet sin champ chantunal

Il champ d'applicaziun da la lescha davart il princip da transparenza (LCTrans) è restrenschì sin il plaun chantunal. Il princip da transparenza vala en general per las autoritads, per las administraziuns e per las cumissiuns dal chantun sco er da las corporaziuns, dals instituts e da las fundaziuns da dretg public chantunal. Las excepziuns èn regladas en las leschas. Quellas cumpiglian en spezial ils furniturs da prestaziuns en il sectur da sanadad ed en il champ social (sco l'ospital chantunal dal Grischun, ils servetschs psichiatrics dal Grischun u l'institut d'assicuranza sociala dal Grischun), las instituziuns che stattan en ina concurrenza economica (sco per exempel la Viafier retica u la Banca chantunala grischuna) sco er las autoritads giudizialas en il sectur da la giurisdicziun. Exclus resta er l'access a cumissiuns da controlla, da surveglianza e d'inquisiziun dal Cussegl grond.

RR novitads 11:00