Siglir tar il cuntegn

Header

Video
Cussegl grond davart rapport da la PUK
Or da Telesguard dals 02.12.2019.
laschar ir
cuntegn

Debatta rapport PUK Er Cussegl grond crititgescha Polizia chantunala

Era en il Cussegl grond frunta l'agir da la Polizia chantunala en il cas Quadroni sin critica. Deputadas e deputads han prendì per enconuschientscha il rapport da la cumissiun d'inquisiziun parlamentara PUK.

Pliras deputadas e deputads han ditg ch'els sajan stads schoccads e trumpads dals sbagls che sajan vegnids a la glisch en connex cun las acziuns da polizia encunter il whistleblower Adam Quadroni.

Ins ha fatg entiert ad Adam Quadroni. Punct.
Autur: Conradin CaviezelSchef da la fracziun PS

Impurtant saja uss che la regenza tiria las dretgas consequenzas: Scolar policistas e policists, controllar meglier lur lavur, documentar meglier discurs e decisiuns ed introducir in uschenumnà «management da privel» per pudair giuditgar ad uras sch'ina persuna è privlusa u betg. Pia realisar quai che la PUK propona en ses rapport.

Tuttina na dastgan ins betg pauschalisar, malgrà tutta critica. En il cas Quadroni n'hajan blers betg fatg ina buna figura. En general fetschian la polizia e l'administraziun dentant buna lavur. Era perquai stoppian la regenza e la politica far uss tut il pussaivel per che la populaziun haja puspè fidanza en quellas instituziuns.

La populaziun dastga e sto pudair fidar che la polizia lavura fair.
Autur: Remo CavegnPresident Uniun da polizia e deputà PCD

Peter Peyer stat davos il cumandant

Pliras deputadas e deputads han era mess en dumonda la rolla da Walter Schlegel sco cumandant da la Polizia chantunala. Peter Peyer, schef dal Departament da giustia e polizia, ha dentant accentuà che Walter Schlegel haja vinavant sia cumplaina fidanza.

Laschar rudlar chaus n'è nagina cumpetenza da manar.
Autur: Peter PeyerCusseglier guvernativ

Il Cussegl grond ha prendì per enconuschientscha il rapport da la PUK. Sche singulas deputadas e deputads pretendan dapli mesiras da la regenza vegn a sa mussar ils proxims dis cura ch'i va per inoltrar quellas.

RTR novitads 17:00