Ensemen cun la software da decleraziun SofTax 2019 metta l'Administraziun chantunala da taglia a disposiziun l'app «GR DocCapture» per iOS ed Android. Cun ils apparats mobils adattads (smartphones e tablets) pon ins scannar spert ils documents d'annexa, e lura importar en la decleraziun da taglia SofTax. Da nov stat pia a disposiziun la pussaivladad d'inoltrar la decleraziun da taglia inclusiv agiuntas sin via electronica, senza ch'i dovra in scanner per quai.
Senza suttascripziun
Sche la Confederaziun ed il Chantun stgaffeschan sco igl è da spetgar – en il decurs da l'onn current la basa legala per ina decleraziun da taglia senza suttascripziun, pon il Grischuns e las Grischunas inoltrar gia l'onn proxim la decleraziun da taglia inclusiv agiuntas sin via electronica. Il fegl da quittanza na sto alura betg pli vegnir suttascrit e tramess suenter.
L'app «GR DocCapture» po vegnir chargiada giu gratuitamain dal Apple App Store u dal Google Play Store.
RTR actualitad 11:00