Siglir tar il cuntegn

Chantun Denunzia penala suenter la vendita da la Therme Vals

La regenza grischuna na dat betg suatientscha al recurs da surveglianza cunter la vischnanca da Val S. Pieder. Per pudair sclerir las rinfatschas da corrupziun, ha la regenza fatg ina denunzia penala cunter nunenconuschent.

Legende: Video La vendita da la Therme Vals – era quai corrupziun abspielen. Laufzeit 3:21 Minuten.
Or da Telesguard dals 23.03.2017.

Suenter ina preschentaziun detagliada dals fatgs vegn la regenza grischuna a la conclusiun che:

  • la procedura da vendita saja stada correcta
  • la vischnanca po decider sezza davart il pretsch da vendita da la terma

Uschia che la regenza na possia betg dar suatientscha al recurs da surveglianza e n'intervegnia perquai betg tar la vischnanca, ha ditg la presidenta da regenza, Barbara Janom Steiner.

Il chantun haja en mintga cas prendì serius las rinfatschas gravantas durant sa fatschentar cun il recurs da surveglianza. Cunquai ch'i na saja però betg stà pussaivel da dumandar perditgas u d'avair invista en autras actas, na saja quai betg stà pussaivel da giuditgar il cas ord vista penala.

Per che las rinfatschas da corrupziun possian però vegnir scleridas definitivamian, ha la regenza inoltrà denunzia penala cunter nunenconuschent, quai sin cussegliaziun da Mark Pieth, l'expert dal dretg penal e d'anticorrupziun. Las actas èn ussa tar la procura publica grischuna.

Il recurs e las renfatschas

Quest recurs era vegnì fatg il 2015 d'in abitant da Val per laschar sclerir las circumstanzas da la vendita da la Therme. Rinfatschà ha el tranter auter il pretsch da vendita memia bass e che l’interpresa 7132 SA da Stoffel na sto betg pajar il tschains d’aua. La rinfatscha principala da la regenza grischuna davart la vendita è ina decleraziun d'intenziun tranter l'investider Remo Stoffel ed il cussegl d'administraziun da la terma da lura. Quel aveva concedì a Stoffel in dretg da tractativas exclusiv e suttascrit in'obligaziun d'indemnisaziun (500'000 francs) sch'i na vegniss tar ina vendita.

Il cussegl d'administraziun saja stà pront da sa liar vid Stoffel anc avant ch'ins enconuscheva sia offerta da cumpra, ha declerà Pieth. E quai mettia en discussiun dumondas.

Ils indizis existents

Problematic è para er stà la politica d'infurmaziun dal cussegl d'aministraziun: Cura ch'ina segunda offerta da cumpra - cun la cuminanza d'interess enturn l'architect Peter Zumthor - è vegnida sin maisa, n'ha quella betg survegnì ina invista cumplexa en las actas da fatschenta, sco avant Stoffel.

Qua chattais ina cronica da Val Son Pieder e da Remo Stoffel.

RR novitads 12:00