Siglir tar il cuntegn
cuntegn

Chantun Deputads dal Cussegl grond ston pajar suenter taglia

Las indemnisaziuns dal temp da viadi dals deputads èn vegnidas registradas sco spesas e betg sco salari.

Legenda: Guardar il video Deputads dal Cussegl grond ston pajar suenter taglia. Durada 01:39 minutas.
Or da Telesguard dals 29.11.2018.

300 deputadas e deputads ston pajar suenter taglia, er sch'els n'èn betg la culpa. La raschun è ch'els han survegnì in attest da paja manglus. Indemnisaziuns per viadis èn numnadamain vegnidas registradas sco spesas e betg decleradas sco paja. Quai communitgescha la Chanzlia chantunala. La correctura vegn fatga per ils ultims diesch onns. En total vai per ina summa da 300'000 fin 500'000 francs.

Latiers ston ils deputads pajar suenter per ils davos tschintg onns contribuziuns da las assicuranzas socialas. Quant bler taglia supplementara ch'il singul deputà sto pajar suenter, na pon ins betg dir. Chattà il sbalg ha la controlla da finanzas dal chantun. Sche tuts deputads pertutgads acceptan da pajar suenter la taglia, vegn ins a vesair.

Tenor las partidas sa tracti dad in'istorgia deplorabla. Almain haja il chantun chattà il sbagl e veglia uss curreger quel.

Tut correct il 2018

Sin l'attest da paja 2018 vegnian las indemnisaziuns dal temp da viadi inditgadas correctamain. Per stgaffir segirezza giuridica duai l'urden da gestiun dal Cussegl grond vegnir adattà en la sessiun da december, scriva la Chanzlia chantunala.

RR novitads 15:00