Siglir tar il cuntegn

Header

cuntegn

Di d'archeologia Alla tschertga dals stgazis ch'èn sut Cuira

Al di d'archeologia ha il servetsch archeologic ensemen cun Cuira turissem ed il museum retic mussà insaquantas da las pli impurtantas exchavaziuns dals ultims onns.

Punct las 10:00 la sonda bun'ura è ina gruppa d'interessadas ed interessads sa rimnada sin la plazza S. Martin a Cuira per far ina pitschna guida tras la citad veglia. Manà la guida ha Verena Gruber che maina er guidas turisticas per Cuira turissem. Dentant quella giada n'è quai betg ina purschida turistica, mabain igl è in da plirs eveniments ch'il servetsch archeologic, Curia turissem ed il museum retic han instradà per il di archeologic a Cuira – che ha gì lieu a chaschun dals dis europeics da l'archeologia.

En trais lieus da la citad veglia èn lura er stads staziunads archeologs che han mussà exchavaziun ubain han raquintà anecdotas. Ina da las pli impurtantas scuvertas dals ultims onns han ils archeologs chattà sut il Sennhof. Ina schablona da crap per far in ornament en furma d'ina crusch. «Savens chattain nus be l'ornament, uss avain nus chattà ina schablona che mussa er exact co l'ornament vegniva producì», di Bernd Heinzle che preschenta differents stgazis en duas vitrinas.

Betg be «merdas» da la civilisaziun

Il pli savens èn quels stgazis marenghins ubain ossa, savens dentant er sco ins di «merdas» da la civilisaziun sco scalgias ubain guaffens ruts. Dentant magari vegnan er entiras apparaturas nauador, sco per exempel il 2012 tar ina renovaziun d'ina chasa sin il Hegisplatz. Qua han ins chattà in entir furn da brischar vaider. A la gruppa plascha la guida – il pli pitschen participant vuless il pli gugent schizunt in'atgna tauna da far exchavaziuns sper la sablunera ed il pli gugent chattass el «in'entira fossa, e quai na faschess lura betg sgarschur, il spiert dal carstgaun na fiss gie lura betg pli en la fossa, quel fiss lura en il tschiel.»

La curt è plain stgazis

Il proxim stop è tar la curt da l'uvestgieu – qua hajan ins chattà numerus stgazis. Mathias Seifert ch'è l'archeolog sin quai post da la guida raquinta er intginas anecdotas. Per exempel sco l'ossa da Jürg Jenatsch ch'è satrada sin la curt è vegnida exchavada cun lubientscha da l'uvestgieu duas giadas. L'emprima giada per conservar sia vestgadira, la segunda giada per controllar sche l'ossa en la fossa tutgan er propi tar Jürg Jenatsch. Cun cumparegliar DNA da ses skelet cun da quella da ses parents han ins pudì mussar, cun 98% probabladad ha propi Jürg Jenatsch chattà sia pasch en la fossa sin la curt.

La guida archeologica duai proximamain vegnir prendida si en la purschida da guidas da Cuira turissem.

audio
Guida archeologica tras Cuira
05:17 min, Actualitad dals 21.06.2021.
laschar ir. Durada: 05:17 minutas.

RTR actualitad 07:00

Artitgels legids il pli savens

Scrollar a sanestra Scrollar a dretga