Siglir tar il cuntegn

Header

Navigaziun

Legenda: Tadlar il audio Mezdi: Di mundial da fugitivs – istorgia persunala da Khalil Peimon. Durada 03:20 minutas.
Or da Actualitad dals 20.06.2019.
cuntegn

Di mundial dals fugitivs «En Svizra ma sent jau bain, perquai ch'jau sun en segirtad»

Il settember 2015 ha Khalil Peimon prendì la decisiun da fugir da l'Afganistan. Ina destinaziun concreta n'aveva el betg en mira. Il sulet ch'el vuleva era segirtad e pasch.

Ina notg il settember 2015 ha Khalil Peimon, in giuven ch’aveva lura 16 onns prendì la decisiun da fugir da sia patria.

A mai è capità insatge uschè sgarschaivel, ch’jau hai savì che jau stoss scappar. Quai era la notg a las trais.
Autur: Khalil PeimonFugitiv dal Afghanistan

Nua ch'el vuleva ir, na saveva el lura anc betg. Il sulet ch’el saveva era ch'el veglia fugir da la violenza e viver en pasch. Quai ha dentant era muntà ch'el ha stuì laschar enavos ses fragliuns. Ils geniturs dal giuven èn omadus gia morts, cura che Khalil aveva 10 onns.

Khalil è partì l’emprim toc a pe fin tar in cuntrabandist da persunas – in uschenumnà «schlepper». Cun cuntrabandists da persunas è il giuven viagià enfin en Tirchia. Là ha el midà sin in bastiment, bus e tren.

Cura ch’el è la finala arrivà en Svizra è Khalil l’emprim vegnì plazzà a Turitg Altstetten, lura a Cuira e la finala a Mustér. Durant ses temp a Mustér ha el era cumenzà a far carate a Glion.

Cura ch'jau era a Mustér hai jau savì, ch’jau stoss chattar in hobi. Quai gida d’emprender ina lingua e da vegnir en contact cun ils indigens.
Autur: Khalil Peimonfugitiv da l'Afghanistan

En la scola da carate a Glion ha Khalil emprendì d’enconuscher ina massa nova glieud. Uschia era la famiglia ch’ha entant prendì si el en lur dachasa a Danis.

Il mument fa il giuven da 19 onns in onn da scolaziun integrativa a Schiers. Là emprendan ils fugitivs la lingua, l’utilisaziun dal computer, ma era dapli davart la vita e cultura en Svizra.

Ina foti da Khalil en stanza da scola a Schiers, Leu fa el pil mument in onn da scolaziun integrativa.
Legenda: Khalil Peimon fa il mument in onn da scolaziun integrativa a Schiers. RTR, Carin Caduff

L’avust cumenza Khalil ses emprendissadi en la chasa da tgira a Vella en Val Lumnezia. El saja sa decidì per quest mastergn surtut pervi da l’aspect social – il vulair gidar persunas che dovran sustegn.

RR actualitad 12:00