Suenter la decisiun dal cussegl federal d'extender la votaziun electronica è il e-voting stà il tema central da la conferenza. Las chancelieras ed ils chanceliers èn s'occupads dals pass concludids dal cussegl federal per introducir l’e-voting en l'entir pajais.
Bainvegni da Barbara Janom Steiner
A la dieta en la sala Chalavaina a Cuira èn sa participads 21 chancelieras e chanceliers, il chancelier federal Walter Thurnherr ed il pledader dal Cussegl federal André Simonazzi. La conferenza è stada sut la direcziun da la presidenta Barbara Schüpbach-Guggenbühl (BS). A chaschun da la tschaina ha la presidenta da la regenza Barbara Janom Steiner beneventà cordialmain ils giasts en il Grischun.
La Conferenza svizra dals chanceliers chantunals è vegnida fundada l'onn 1900 a Turitg. Duas giadas per onn sa radunan las chancelieras ed ils chanceliers dals chantuns sco er il chancelier federal per questa conferenza. Ina da lur incumbensas centralas è l'ulteriur svilup da las prestaziuns da stab da las autoritads. En il focus stattan qua il sustegn da la direcziun, la planisaziun, las refurmas sin plaun da la regenza e dal parlament e las elecziuns e votaziuns.
RR novitads 12:00