Il favrer è la dischoccupaziun en il Grischun sa reducida levet, la quota da dischoccupaziun resta dentant sin 2,0%. En total ha l'Uffizi per industria, mastergn e lavur registrà 2'184 persunas senza lavur, quai èn 51 pli pauc ch'il schaner, dentant bunamain 900 dapli ch'il favrer 2020.
Las pli bleras persunas senza lavur vegnan ord la branscha da construcziun e la gastronomia. Il favrer ha il chantun pajà a bunamain 1'800 manaschis indemnisaziuns per lavur curta.
Dapi il cumenzament da la pandemia è la quota sin aut nivel. La primavaira passada vevi dà in ferm augment, avant la stad è la situaziun sa quietada in zic. La cifra da dischoccupaziun è dapi lura dentant anc adina sin nivel aut. Quai na saja betg extraordinari inquietant di il manader da l'Uffizi chantunal d'industria, mastergn e lavur Gian Reto Caduff. La gronda dumonda saja dentant quant ditg che la situaziun cuntinua anc uschia e quant donn che la situaziun fa uschia al martgà da lavur grischun.
Positiv è che la segunda unda n'ha betg gì in tal effect sin la dischoccupaziun. Quai mussa che mesiras sco lavur curta impedeschan dapli relaschadas.
Quota svizra tar 3,6%
En Svizra è la dischoccupaziun sa reducida sin 168'000. La quota munta a 3,6%, sco il Secretariat da stadi per l'economia SECO scriva.
