I vegn debattà, discussiunà e magari er sa vilentà en il Cussegl grond. Mo tge gira insumma en las pausas u sch'ils politichers e las politcheras n’èn betg gist en sala vi da tractar fatschentas? Durant ina pitschna spassegiada entaup'ins inquala ed inqual. Mo tant: I vegn er durant las pausas magari politisà, dentant prendan las deputadas ed ils deputads er peda per discurrer davart chaussas privatas.
Er la taglia è in zic tema en il zuler dal Cussegl grond
L’emna passada ha la regenza grischuna annunzià ch’ella veglia sbassar il pe da taglia per 5%. E plinavant duai dar in segund pass cun ina revisiun da la lescha da taglia. Malgrà che il Cussegl grond vegn a tractar questa reducziun da taglia pir il december en il rom dal preventiv 2024, èsi tuttina gia ina tematica che dat da discussiunar. Nus avain rimnà reacziuns da differentas deputadas e deputads.
