Siglir tar il cuntegn

Chantun Divers territoris da skis han in manaschi reducì

Suenter la blera naiv ch'il stemprà Burglind ha purtà han divers territoris da skis sulet in manaschi reducì. Entras la situaziun critica da lavinas ston ils responsabels siglientar lavinas e segirar las pistas. En l'Arena Alva han persunas stuì vegnir evacuadas suenter in disturbi.

Pendiculara Laax.
Legenda: En il territori da skis a Laax è la gronda part dals indrizs en funcziun. Keystone

Curt e concis:

  • Blers territoris han sulet in manaschi reducì. Ma en l'entir Grischun èn ils blers territoris averts.
  • A Laax èn pliras persunas vegnidas evacuadas suenter in incap. La colliaziun da Curnius sin il Crap Sogn Gion è stada interrutta per duas uras.
  • I dat dentant era territoris nua che tut ils indriz èn en funcziun.

Pausa sfurzada a Laax

La staziun da val da Curnius sin il Crap Sogn Gion è stada interrutta per duas uras. Dus sezs sajan encugnads, communitgescha l'Arena Alva. Ils passagiers hajan stuì vegnir evacuads. Per cletg per las persunas che spetgavan saja l'aura stada buna, cun sulegl e cun temperaturas miaivlas. Curt suenter l'ina haja la sutgera puspè pudì vegnir prendida en funcziun. Per ils giasts bloccads hai dà ina bon per ina carta dal di, scrivan ils responsabels.

Siglientar lavinas per pistas segiras

Ils blers territoris en il Grischun han avert la gronda part dals indrizs e las pistas. En Surselva èn tut ils territoris averts. Ils indrizs en ils auts èn dentant per part anc serrads pervia dal privel da lavinas grond. A Laax per exempel èn actualmain 20 da 29 indrizs averts.

Era tar las pendicularas en l'Engiadina èn diversas pistas serradas pervia dal privel da lavinas. A Scuol per exempel èn 8 da 13 indrizs averts. Il mument èn ils responsabels vid siglientar lavinas e segirar las pistas ch'èn anc serradas. Ed en il territori dad Arosa e Lai èn 40 da 43 indrizs averts.

A Savognin dentant para la naiv betg d'avair ina fitg gronda influenza sin il manaschi: Actualmain èn tut ils 12 indrizs dal territori averts.

Pendicularas da Scuol han gì bleras lavinas spontanas

Tenor il directur da las pendicularas da Scuol saja la situaziun da l'aura cun ferms vents e blera naiv stada extraordinaria. Collavuraturs che lavurian gia dapi decennis en il territori da skis n'hajan strusch vis uschè bleras lavinas spontanas sco ils davos dis. Suenter in di da preparar e segirar las pistas quinta Poo dentant puspè da savair avrir sin fin d'emna tut ils indrizs.

Situaziun sco auters envierns era

Era en il territori da Sedrun Andermatt hai dà il venderdi in manaschi reducì. Tenor il directur Silvio Schmid na saja la situaziun dentant betg extraordinaria era sch'i haja da vents da record cun 213 km/h sin l'Alpsu. Situaziuns sco quellas haja dentant anc da pli. Il sulet che caschunia ulteriurs problems saja l'interrupziun dalla lingia da tren tranter Andermatt e Sedrun. La finamira saja uss dentant da preparar tut las pistas per damaun. Sch'i tanschia dad dar liber la colliaziun da tren, saja dentant betg anc cler.

RR actualitad 12:00