Siglir tar il cuntegn

Chantun Divers territoris Grischuns serran quist onn gia avant Pasca

En bun in mais èsi Pasca, e Pasca munta savens era la fin da la stagiun da skis. Cunquai che Pasca è quest onn dentant pir mez avrigl, serran differents territoris gia avant. En auters territoris èsi dentant pussaivel dad ir cun skis enfin il matg.

Persunas che van cun skis e snowboard sin il Crap Sogn Gion sur Laax.
Legenda: Èn blers territoris èsi pussaivel dad i cun skis enfin glindesdi Pasca sco qua a Laax. Keystone

A Cuira e conturn fai gia primavaira. Il sulegl lascha luar la naiv. Quellas temperaturas na fan dentant nagina tema als responsabels da las pendicularas. Sco differents responsabels han ditg, tanschia la naiv enfin la fin da la stagiun da skis 2017. Uschia per exempel en il territori da skis a Breil. Tenor il directur Beat Zenklusen, possian els segir laschar avert las pistas si els auts enfin ils dus d’avrigl. Tut tenor stoppian els dentant serrar las pistas fin giu la val. Cunzunt tar quella fin Vuorz pudessi vegnì stretg cun la naiv.

Era auters territoris n’han betg preparà in scenari alternativ

Era sin la Motta Naluns a Scuol ed en il territori da Tavau èn ils responsabels optimistics che la naiv tanschia enfin la fin da la stagiun. A Scuol è Chasper Planta segir ch’i haja avunda naiv en las regiuns pli autas. Quai cunzunt grazia a la naiv da l’emna passada. Pli critic vegni dentant tar las pistas fin giu la vall. I saja dentant normal che quellas serrian avant Pasca.

Las pendicularas da Tavau n’han medemamain betg ponderà in plan alternativ per cas che la naiv vegnia stretga. Anzi, a Tavau èn las bun diesch pistas enturn il Jakobshorn schizunt avertas anc in’emna suenter Pasca, numnadamain enfin ils 23 d’avrigl.

Era tar ils auters territoris gronds ch'èn vegnids resguardads per questa survista, tunavi sumegliant. Enfin tar runals en ils vitgs e las pistas fin giu la val quintan els da pudair tegnair avert las pistas uschè ditg sco previs.

RR actualitad 12:00