«Doccall» - ina app per clamar il medi che ha servetsch d'urgenza

La situaziun è enconuschenta: Igl è be ina bagatella, ma l'agid dal medi fiss bun. In telefon al clom d'urgenza 144 fiss però surfatg. Ma tge medi ha gist servetsch d'urgenza? E tge numer ha quel puspè? Per questa situaziun porscha la nova applicaziun «doccall» ina schliaziun.

Laschar ir video «App Doccall per cas d'urgenza»

App Doccall per cas d'urgenza

2:43 min, Telesguard dals 6.11.2017
screenshot da la applicaziun «doccall» cun ils buttuns da contact Avrir maletg en lightbox.

Legenda da maletgs: L'app porscha ina opziun per contactar in medi èn la regiun da domicil ed ina per il lieu nua ch'ins sa chatta gist. RTR, Gion Gieri flepp

Fin uss eri en ils blers cas da guardar suenter il numer dal medi ubain en il cudesch da telefon, sin in figl sgulant che las chasadas survegnan magari u en l'internet.

Tut ils numers en in lieu

La nova applicaziun gratuita per i-OS ed Android unescha ils numers da telefon sco er ils plans da servetsch dals medis d'urgenza en l'entira Svizra. Cura ch'ins telefonescha datti duas opziuns, l'agid d'urgenza en il lieu da domicil ubain en il lieu, nua ch'ins sa chatta gist.

Plinavant porscha l'applicaziun er la pussaivladad da gist trametter datas persunalas sco adressa, cassa da malsauns u datas medicinalas cun in clic al medi d'urgenza en il mument dal telefon.

Er per rumantsch

Il servetsch gratuit vegn lantschà en tschertas regiuns dal Grischun, cunzunt turisticas, gia sin questa stagiun d'enviern. L'applicaziun datti per tudestg, franzos, talian e rumantsch.

Digitip – «doccall»

2:54 min, Tips, trics e tacs dals 06.11.2017

En il Grischun è l'app vegnida elavurada da la fatschenta Visionary AG da Turitg ch'è er responsabla per la plattafurma da contacts «docbox». A quella sa participeschan gia passa 8'500 medis, otg call centers medicinals, 30 ospitals e passa 100 apotecas e fatschentas da farma. L'app «doccall» è per uschè dir l'attatg a quella.

RR Tips Trics e Tacs 10:15