Tar il pass da vacanzas da la Pro Juventute a Domat è in uffant ch'è sa participà vegnì testà positiv sin il coronavirus, uschia il manader da fatschenta da Pro Juventute Grischun Sandro Simon Caviezel.
Radund 40 persunas èn pervi da quai uss en quarantina, i n'haja enfin uss dentant dà nagins ulteriurs cas positivs. Tuttina èn las ulteriuras purschidas dal pass da vacanzas a Domat vegnidas annulladas.
Per ils ulteriurs pass da vacanzas en il Grischun n'ha il cas a Domat naginas consequenzas. Quels vegnan cuntinuads sco planisà.
Malsegirtads e discussiuns
Sa chapescha haja quai dentant dà malsegirtads suenter che l'uffant è vegnì testà positiv, er en autras regiuns, ed i haja er dà discussiuns sch'ins vul cuntinuar cun ils pass da vacanzas u betg. Perquai hajan ins er surlaschà la decisiun sche cuntinuar u betg als organisaturs en il lieu. Quels hajan dentant tuts decidì da cuntinuar, uschia Sandro Simon Caviezel vinavant.
Er perquai ch'i fetschia senn da porscher il pass da vacanzas als uffants. Cunzunt er perquai ch'il pass da vacanzas ha in concept da segirtad nua ch'er ils contacts dals uffants vegnan prendids si. Quai na saja betg il cas sch'ils uffants èn uschiglio en gir cun auters uffants, uschia Sandro Simon Caviezel.
