Donns ch'èn vegnids chaschunads da la natira e betg dad ina persuna, numnan ins donns elementars.
Assicuranzas en connex cun donns da malaura
Sche malauras chaschunan grevs donns èsi bun da savair, tge pussaivladads ch'ins ha sco pertutgada u pertutgà. Questas assicuranzas pon tut tenor situaziun pajar ils donns:
L'assicuranza d'edifizis
Donns ch'èn vegnids chaschunads vi dal bajetg paja l'assicuranza d'edifizis.
Sch'i dat in'inundaziun en il tschaler e las paraids èn tras quai donnegiadas, alura surpiglia l'assicuranza d'edifizis quest donn.
L'assicuranza d'edifizis ha tenor Frédéric Papp era ina franschisa, vul dir ina cumpart ch'il assicurà sto pajar sez. Tut tenor societad d'assicuranzas po quella summa dentant variar. Auter vesa quai ora tar donns chaschunads da terratrembels. Quels na vegnan betg surpigliads da l'assicuranza d'edifizis.
L'assicuranza da mobigliar
La televisiun, il mobigliar da curtin u la vestgadira èn vegnids donnegiads tras in'inundaziun u in fieu? Alura paja l'assicuranza da mobigliar quest donns. I vegn stimà la valita da la rauba da chasa ed uschia fixà la summa assicurada. Era tar quell'assicuranza datti ina part che l'assicurà sto surpigliar sez. Tenor l'expert munta la franschisa tar donns elementars normalmain a 500 francs.
En cas d'in donn total, per exempel sche tut la rauba da chasa è arsa pervia d'ina culpina d'in chametg, paja l'assicuranza da mobiglias la summa assicurada.
L'assicuranza da casco
Sch'igl auto è vegnì tutgà d'ina planta u donnegià da granella, lura paja l'assicuranza da casco quest donn. Damai ch'i sa tracta da donns chaschunads da la natira – pia donns elementars – tanscha in'assicuranza da casco parziala. In'assicuranza da casco cumplaina surpiglia vitiers anc ils donns ch'ins ha chaschunà sez.
Co ir avant?
L'impurtant è da directamain annunziar il donn a l'assicuranza. Plinavant èsi da fotografar l'object donnegià.
Sche l'auto ha in donn recumonda Frédéric Papp da spetgar sin l'avis da l'assicuranza, avant che ir cun el en garascha per laschar reparar. Uschiglio possia quai dar problems cun l'assicuranza.