Siglir tar il cuntegn

Header

video
Dossier sa retarda
Or da Telesguard dals 30.06.2016.
laschar ir. Durada: 2 minutas 1 Secunda.
cuntegn

Chantun Dossier da candidatura per gieus olimpics en retard

Il dossier per ina candidatura eventuala per gieus olimpics il 2026 ha retard. Planisà eri d'inoltrar quel il mais da zercladur.

audio
Mezdi: Gieus olimpics 2026 - concept ha retard
ord Actualitad dals 30.06.2016.
laschar ir. Durada: 2 minutas 15 Secundas.

Las organisaziuns tetgalas da l'economia grischuna ed il team responsabel per il dossier han infurmà il cusseglier guvernativ Jon Domenic Parolini davart la situaziun actuala.

Previs era d'inoltrar il dossier da candidatura a la regenza la fin da zercladur. Quai saja il mument memia baud scriva l'Uniun grischuna d'artisanadi e mastergn. I dovria anc scleriments cunzunt en ils lieus d’occurrenza. Ils contacts cun Tavau, Flem/Laax, Lai, Arosa e San Murezzan sco era cun la citad da Cuira sajan instradads, scriva l’uniun d’artisanadi grischuna.

Il comité che vul organisar ina candidatura grischuna per gieus olimpics il 2026.
Legenda: Il comité che vul organisar ina candidatura grischuna per gieus olimpics il 2026. mad

Plinavant veglian ins era anc sclerir cun la Confederaziun en tge rom ch'ella sustegnia ina candidatura ed era cun la citad da Turitg ed il chantun Turitg sco er envers Swiss Olimpic dettia quai anc dumondas avertas, uschia Urs Schädler president da l'Uniun d'artisanadi grischuna. Il team da concept enturn Urs Schädler ed Andreas Wieland, il schef da la Hamilton a Panaduz, vul surdar il concept a la regenza fin la fin d'avust a la regenza grischuna.

Retard nagin problem per la regenza grischuna

Sco quai che cusseglier guvernativ Jon Domenic Parolini ha ditg envers RTR na saja il retard fin l'avust betg in problem per la regenza, gist er perquai ch'i dettia anc bleras dumondas da sclerir.

La regenza grischuna stoppia inoltrar la candidatura definitiva fin ils 15 da december 2016, uschia ch'i restia anc avunda temp per ella dad elavurar la missiva pils gieus olimpics ch'il Cussegl grond vegnia a tractar il favrer 2017, uschia Parolini.

Digitalisaziun sco perspectiva

Tenor Urs Schädler pudess la candidatura per gieus olimpics 2026 dar differents impuls al chantun Grischun ed a sia economia. En il center da la visiun dal team da planisaziun stat ina offensiva da digitalisaziun fin l'onn 2026 per avischinar las regiuns muntagnardas a quellas urbanas.

RR novitads 09:00

Artitgels legids il pli savens