La Pro Grigioni Italiano (PGI) aveva fatg lobbing avant quatter onns. Ella avevia scrit brevs a tut ils deputads ed a tut las deputadas dal Cussegl grond, sa regorda Paolo Fontana, collavuratur scientific da la PGI.
Ins haja regurdà ils deputads, ch’i sa tractia d’ina dumonda da respect visavi a la minoritad e visavi al stadi da dretg dad avair in derschader talian a la Dretgira chantunala.
Accusà sa defenda – derschader na chapescha nagut
Pudair discurrer l’atgna lingua avant dretgira – quest dretg hajan las minoritads chantunalas, pia ils Talians e Rumantschs, di Paolo Fontana. Ed ellas hajan era il dretg dad esser chapidas.
I saja numnadamain capità en plirs cas, ch’in accusà da lingua taliana haja empruvà da sa defender ed il derschader na chapivia nagut. Tut quai ha la PGI explitgà en sia campagna ch’ella ha fatg avant quatter onns era en las medias.
Il settember 2016 ha il Cussegl grond elegì il giurist talian Davide Pedrotti sco nov derschader. Ina pintga sensaziun – pertge la cumissiun da giustia aveva proponì in auter candidat.
Nus avevan insistì gia decennis a l’impurtanza d’avair in derschader da lingua taliana.
Cun insister e turnar ad insister ha la PGI la finala cuntanschì ina represchentanza taliana a la Dretgira chantunala – sa chapescha era perquai che Davide Pedrotti possediva tuttas qualificaziuns necessarias per il post.
Uss, quatter onns pli tard, spera Paolo Fontana ch’il Cussegl grond tegnia vinavant quint al dretg da las minoritads d’avair lur derschaders. L’avust elegia u reelegia il Cussegl grond ils derschaders da la dretgira chantunala. La lescha prescrivia che las minoritads sajan represchentadas a moda adequata.
Adequat na po betg esser nulla
Quai signifitgeschia ch’ina represchentanza stoppia esser garantida. Ina represchentanza adequata na possia mai signifitgar ch’i na dettia nagin derschader talian pli.
Adequat na signifitga mai nulla.
