Siglir tar il cuntegn

Header

cuntegn

Dretgira administrativa Adia lingua rumantscha

Il sulet derschader rumantsch banduna la Drertgira administrativa grischuna. Ramona Pedretti vegn proponida sco successura. Sch’il Cussegl grond elegia la fin d’avust la giurista da Brusio, èsi finì cun sentenzias rumantschas.

Ils derschader Robert Stecher abditgescha sin la fin da settember sia plazza. El ha procurà che tschertas sentenzias èn vegnidas scrittas per rumantsch, per exempel quella da tempo 30 atras Sumvitg. Uschia ha perfin il Tribunal federal a Losanna respundì il recurs per rumantsch.

Betg tschertgà in Rumantsch

Sia plazza è vegnida scritta ora il mars passà. En l’inserat n’è da chattar nagin avis ch’i manca en l’avegnir in Rumantsch. Ilario Bondolfi, il president da la cumissiun da giustia di, ch’ins haja scrit ora la plazza tenor las prescripziuns en la lescha.

audio
Mezdi: Betg tschertgà explicit in Rumantsch
ord Actualitad dals 16.08.2019.
laschar ir. Durada: 3 minutas 16 Secundas.

La cumissiun ha en il fratemp dà giu ina recumandaziun al Cussegl grond. Il num na vul Ilario Bondolfi anc betg tradir. El s’exprima dentant cun in tschert entusiassem davart la giurista recumandada.

Igl è ina dama da Brusio cun autas qualificaziuns.
Autur: Ilario Bondolfi president da la cumissiun da giustia dal Cussegl grond

Socialdemocrats èn decisivs

Il derschader partent appartegna a la Partida socialdemocratica (PS). Perquai èsi decisiv, tgi che la fracziun propona. Lezza suondia la recumandaziun da la cumissiun da giustia, conferma il schef da fracziun Conradin Caviezel. Cun ina tscherta luschezza tradescha el era il num da la candidata: Ramona Pedretti.

Ella ha scrit ina dissertaziun ch'è vegnida premiada, ha lavurà al Tribunal federal e posseda vasta experientscha en il dretg public – ina qualificaziun ch'i dovra per questa plazza. Plinavant è ella stada sco nudadra a campiunadis europeics e mundials.

audio
Mezdi: Il socialdemocrats proponan candidata
ord Actualitad dals 16.08.2019.
laschar ir. Durada: 3 minutas 7 Secundas.

Era dunnas èn raras

La PS haja tenor proporz da partida sulet il dretg sin in sez a las duas dretgiras chantunalas, di il schef da fracziun da la PS. Cun Robert Stecher haja la partida tschentà ils ultims onns in Rumantsch. Uss proponian ins ina dunna da lingua taliana.

Nus resguardain tuttavia las minoritads, ma nus avain dabun be in derschader
Autur: Conradin Caviezel schef da fracziun da la PS

Ins stoppia era esser pertschart, ch’igl haja da preschent sulet duas dunnas sco derschadras a las pli autas dretgiras grischunas.

Anc plirs Rumantschs abditgeschan

En la lescha stat scrit, che las linguas chantunalas stoppian esser represchentadas commensuradamain a las dretgiras. Da procurar per quai, saja dentant chaussa da tuttas partidas, di il schef da fracziun da la PS. Conradin Caviezel è persvadì che las autras fracziuns possedian la sensibilitad necessaria.

E quai vegnan las autras fracziuns a pudair demonstrar ils proxims mais: Pertge, betg mo a la dretgira administrativa va in derschader rumantsch, mabain era a la Dretgira chantunala. Là datti per il mument dus derschaders da lingua rumantscha. In dad els ha gist demissiunà, l’auter va en in u dus onns en pensiun.

Duas dretgiras ed indesch derschaders

Avrir la box Serrar la box

En il Grischun datti duas dretgiras supremas:

  • La Dretgira chantunala tracta cas dal dretg penal e dal dretg privat. Là lavuran 6 derschaders.
  • La Dretgira administrativa grischuna tracta cas dal dretg public. Là lavuran 5 derschaders.

RR actualitad 12:00

Artitgels legids il pli savens