Siglir tar il cuntegn
Inhalt

Chantun Dretgira administrativa n'entra betg en chaussa maiorz

L'atun passà han tschintg partidas e 54 persunas cun dretg da votar inoltrà in recurs cunter il sistem da maiorz. Uss ha la dretgira administrativa dal chantun Grischun decidì da betg entrar en materia. Uschia va il cas vinavant tar il Tribunal federal.

Microfons.
Legenda: Era il segund recurs cunter las elecziuns dal Cussegl grond tenor il sistem da maiorz n'ha nagin success. RTR

Ils recurrents hajan agì a temp, ma il represchentant legal dals recurrents n’era betg autorisà da recurrer, scriva la dretgira administrativa dal chantun Grischun. L'advocat n'era il mument dal recurs betg inscrit en il register chantunal dals advocats. Tenor las reglas da procedura è quai dentant la premissa per ina represchentanza valaivla davant dretgira. Il segund motiv che la Dretgira administrativa n'è betg entrada en il recurs è ch'ella na dastga gnanc far quai.

Dretgira administrativa na dastga betg decider en chaussa

La Dretgira administrativa dal chantun Grischun ha ultra da quai accentuà, ch'ella fiss en omadus cas betg entrà en chaussa. Per motivs da la separaziun da pussanzas na dastgia la Dretgira administrativa gnanca examinar, schebain la constituziun chantunala saja legitima u betg. La cumpetenza da la dretgira sa restrenschia sin la dumonda, sche disposiziuns da leschas e decrets chantunals correspundian al dretg surordinà.

Uschia n’ha era la segunda emprova da far recurs cunter las elecziuns dal Cussegl grond tenor il sistem da maiorz, pervi d’ina formalitad nagin success. Gia il 2014 aveva in tal recurs fatg naufragi. Als recurrents n'èn vegnids adossads nagins custs. Cunter la sentenzia po vegnir recurrì al Tribunal federal.

Ils pertutgads èn cuntents cun la decisiun

Che la Dretgira administrativa haja uss communitgà ch'ella na decidia betg en chaussa, cuntenta il represchentant legal Andreas Auer. Ch'il cas sa tschentia uschia tar il Tribunal federal a Losanna saja stà sia finamira e quella dals recurrents. Inoltrà il recurs il settember 2017 avevan 54 burgaisas e burgais, la Partida socialdemocratica ed anc ulteriuras quatter partidas pitschnas. Er il president da la PS Grischuna Philipp Wilhelm è satisfatg da la decisiun. Tenor el decida uschia la dretga instanza davart la legitimaziun dal sistem electoral da maiorz en il chantun Grischun.

RR novitads 11:30