Il 2018 ha la Dretgira chantunala dal Grischun gì da decider davart ina dispita dad ierta. Sco las retschertgas da SRF e la Republik mussan datti duas variantas da la sentenzia dals 15 da matg:
- L'emprima varianta che n'è mai vegnida publitgada, di che l'accusader survegn in mez milliun francs. Tar l'accusader sa tracti d'in figl dal defunct.
- La segunda variant vegna dentant a la conclusiun ch'ils daners duain ir a l'advocat dal defunct. Perquai che quel era entant mort, duevan ils daners ir a sia ertavla.
Or dals documents resorta ultra da quai er ch'il president da la dretgira admetta envers ses collegas, d'avair ordinà la midada da sentenzia dals 15 da matg 2018, senza avair orientà ils auters derschaders.
President da la dretgira dementescha
Confruntà cun las renfatschas, ha il president da la dretgira dentant dementà las renfatschas a scrit envers ils schurnalists. I saja cler ch'in derschader sulet na dastgia betg midar ina sentenzia ch'ina chombra da dretgira haja prendì. Quai na saja er betg capità. La chombra haja dà l'incumbensa da midar la sentenzia.
L'agir dal president ha uss consequenzas. Tar la Procura publica èn vegnidas inoltradas duas denunzias penalas pervi da falsificaziun da documents – ina d'in ulteriur derschader e l'autra da l'advocat actual dal figl dal defunct. Ed er la cumissiun da giustia intercurescha eventualas irregularitads a la Dretgira chantunala. I vala la presumziun d'innozenza.
Agir betg chapibel per experts
Ils experts dumandads da SRF e Republik reageschan cun malchapientscha sin l'agir dal president da la dertgira chantunala. L'expert dal dretg constituziunal da Basilea, Markus Schefer, ha examinà ils documents: Tenor el èsi cler, ch'il dispositiv da la sentenzia saja vegnì midà en quest cas. E quai na saja betg lubì. A la medema conclusiun vegnan er dus ulteriurs giurists e dus derschaders.
RTR novitads 10:00