Siglir tar il cuntegn

Header

cuntegn

Dretgira chantunala grischuna Tribunal federal sistescha dus recurs da Schnyder

Il tribunal federal è sa fatschentà cun ils emprims recurs en connex cun las cuntraversas en la Dretgira chantunala dal Grischun. El ha sistì dus recurs ch’il derschader chantunal Peter Schnyder aveva inoltrà. Quai ha il tribunal fatg sin dumonda da Schnyder sez.

Ils dus recurs stattan en connex cun duas decisiuns da la cumissiun da giustia e segirezza dal Cussegl grond da la fin da matg. Ina pertutga la recumandaziun da betg reeleger Peter Schnyder sco derschader chantunal. E tar l’autra sa tracti d'ina reprimanda da la cumissiun cunter Schnyder.

Schnyder ha er fatg recurs davant la dretgira administrativa grischuna encunter questas duas fatschentas. El è da l'avis che lezza dretgira è responsabla per il recurs e betg il Tribunal federal.

Sistì fin november

Il Tribunal federal ha sistì ils dus recurs, enfin che la dretgira grischuna ha decidì. Quai munta che las duas fatschentas ruaussan almain fin il november tar il tribunal.

Dapi onns datti in conflict intern tar la Dretgira chantunala grischuna. Quel è sa cumulà cura che Schnyder ha accusà il president da la dretgira, Norbert Brunner, d'avair midà pli tard e sur sasez ina sentenzia. Entant investighescha la procura publica encunter Brunner.

audio
Per tadlar curt e cumpact
ord Novitads dals 30.07.2020.
laschar ir. Durada: 1 minuta 17 Secundas.

RTR novitads 12:00

Artitgels legids il pli savens