Siglir tar il cuntegn

Header

cuntegn

Dretgira chantunala Recapitulaziun dals svaris

Gist plirs schabetgs èn capitads tar la Dretgira chantunala. En il focus: D'ina sentenzia dal 2018 existan duas versiuns. Il president da la Dretgira chantunala duai avair midà la sentenzia en atgna reschia, quai che lez dementescha.

Ina resumaziun dals fatgs:

Ils 15 da matg 2018 tira la Dretgira chantunala ina sentenzia davart ina dispita d’ierta. In figl erta in mez milliun francs da ses bab. Questa sentenzia na vegn dentant betg publitgada, mabain ina segunda versiun. Tar questa versiun na survegn betg il figl ils daners, mabain la figlia da ses anteriur advocat, quai pervi d’in contract.

audio
Dretgira chantunala - cronologia da la procedura penala
ord Actualitad dals 02.06.2020.
laschar ir. Durada: 3 minutas 35 Secundas.

In collega derschader intervegn

Il mars 2019 intervegn il derschader Peter Schnyder perquai ch’i na dastga betg dar duas versiuns d’ina sentenzia. La Dretgira chantunala instradescha sinaquai ina procedura da relaschar el, dus mais pli tard na lavura Schnyder betg pli sco derschader.

Dumondas avertas

L’ertavel emprova da far reveder la sentenzia, la Dretgira chantunala refusa. Il derschader Peter Schnyder vegn scrit malsaun, el sa drizza cun documents envers il Tribunal federal.

Posta da Losanna

Il schaner 2020 survegnan l’ertavel e ses advocat Gabriel Nigon posta dal Tribunal Federal, els vesan ch’i ha dà duas versiuns da la sentenzia.

Cun quests documents avain nus vesì, tge ch’è propi schabegià, nus eran surprais, quai n'avessan nus betg spetgà.
Autur: Gabriel Nigon advocat da l'ertavel

Envers collegas derschaders ha Norbert Brunner concedì d’avair fatg las midadas en atgna reschia. Confruntà dad SRF e la Republik ha el dentant refusà las renfatschas. La chombra dal tribunal haja incumbensà el e l’actuar da metter en net la sentenzia e da formular il dispositiv da quel.

video
Crititga per president da dretgira chantunala
Or da Telesguard dals 05.02.2020.
laschar ir. Durada: 2 minutas 52 Secundas.

Midar mo sbagls

Tar ina sentenzia ch’è tratga dastgan ins midar mo sbagls ortografics u quints fauss, di Markus Schefer, expert dal dretg constituziunal.

Quai n’è betg stà ina redacziun da la sentenzia, mabain en quest cas è il dispositiv da la sentenzia vegni midà e quai na dastg’ins segir betg.
Autur: Markus Schefer expert dal dretg constituziunal

Il schaner 2020 conferma la cumissiun da giustia dal Cussegl grond ch’ella saja vid intercurir irregularitads eventualas tar la Dretgira chantunala. Tar la procura publica vegnan inoltradas duas denunzias penalas pervi da sfalsificaziun da documents.

La cumissiun da giustia

Avrir la box Serrar la box

Ils 11 commembers:

  • Bondolfi Ilario, PCD, president
  • Schutz Felix, PLD, vicepresident
  • Casty Guido, PBD
  • Derungs Gian, PCD
  • Flütsch Peter, PLD
  • Kunfermann Roland, PCD
  • Müller Julia, PS
  • Perl Andri, PS
  • Salis Mario, PPS
  • Wellig Hans Peter, PLD
  • Widmer Ursin, PBD

La cumissiun da giustia decida l’avrigl che la procura publica grischuna dastga far retschertgas encunter il president da la Dretgira chantunala, Norbert Brunner.

Novs derschaders

L’avrigl 2020 tschertga la Dretgira chantunala in nov derschader perquai ch’il president Brunner va en pensiun. Las inquisiziuns encunter el giajan dentant vinavant, uschia Ilario Bondolfi, il president da la cumissiun da giustia.

Las elecziuns dals derschaders grischuns vegnan stuschadas dal zercladur sin l’avust per che la cumissiun da giustia haja avunda temp per sclerir ils svaris.

Duas dretgiras cun indesch derschaders

Avrir la box Serrar la box

En il Grischun datti duas dretgiras supremas:

  • La Dretgira chantunala tracta cas dal dretg penal e dal dretg privat. Là lavuran 6 derschaders.
  • La Dretgira administrativa grischuna tracta cas dal dretg public. Là lavuran 5 derschaders.

Per tut ils pertutgads vala la presumziun d'innocenza.

RTR actualitad 07:00

Artitgels legids il pli savens