Siglir tar il cuntegn

Header

audio
Culpants u betg - quai la dumonda centrala da la dretgira
Or da Actualitad dals 15.02.2021.
laschar ir. Durada: 02:49 minutas.
cuntegn

Dretgira dal Plaun Patrun e secretaria da la Tscharner SA – culpant u betg?

Il mardi cumenza il process: La firma da puntanadas da Domat duai avair cugliunà cun differents rampigns per betg pajar sururas a ses lavurers.

Al patrun ed a la secretaria da la Tscharner SA vegn renfatschà d’avair sfalsifitgà e cugliunà. La mesemna suentermezdi dat la dretgira regiunala dal Plaun enconuschent sia sentenzia. I vala la presumziun d’innocenza.

Sis onns fin al process – la cronologia

L’avrigl 2015 fa l’Unia ina denunzia penala. Il sindicat renfatscha il suandant a la Tscharner SA:

  • avair manipulà il sistem da quintar las uras da lavur
  • betg avair pajà sururas
  • betg avair pajà ils supplements per lavur da fin d’emna
  • avair sfurzà ils lavurers da lavurar la fin d’emna
  • schicanas cun multas, per exempel sche la vestgiadira n’era betg schubra

Il matg 2015 relascha la Tscharner SA plirs lavurers ch’èn sa dustads cunter talas praticas.

La Tscharner SA vegn per dus onns sin la glista naira dal chantun. Durant quel temp na survegn ella naginas incumbensas dal maun public.

Era la cumissiun paritetica da la branscha da puntanadas reagescha e fa pajar la firma da Domat ina multa. L’autezza da la multa na vegn betg dada enconuschent.

Il matg 2020 concluda la procura publica sias examinaziuns ed accusescha il patrun e la secretaria da la Tscharner SA d’avair commess suandants delicts:

  • sfalsifitgà documents
  • cugliunà
  • violà il dretg da lavur
  • engaschà persunas da l’exteriur senza permis

11 lavurers han survegnì daners

Sis onns èn passads dapi che l’Unia ha fatg la denunzia penala. Per 11 lavurers ha il sindicat cuntanschì l’onn passà indemnisaziuns per las sururas. Quants daners che la firma da puntaners ha pajà a ses anteriurs lavurers n’han las partidas dentant betg ditg.

Uschia ha la dretgira dal Plaun da decider quest’emna be pli davart ils aspects penals en il cas Tscharner.

RTR actualitad 17:00

Artitgels legids il pli savens

Scrollar a sanestra Scrollar a dretga