Siglir tar il cuntegn

Header

cuntegn

DRG – tom 14 Abunents fidaivels – malgrà purschida online

490 abunents restan fidaivels al DRG. Els empostan anc adina ils carnets, malgrà ch’i dess il DRG gea era online.

"Ina dumonda da generaziuns" sch'ins consulteschia pli gugent il dicziunari online u il cudesch, di Carli Tomaschett, manader dal DRG.
Legenda: Online u cudesch? I saja ina dumonda da generaziuns, di Carli Tomaschett, manader dal DRG. Claudia Cadruvi
Mia generaziun è disada da lavurar cun il cudesch e salva l'abunament.
Autur: Carli Tomaschettmanader dal DRG

Igl è cumadaivel: Ins sto mo endatar www.drg.ch,, il link avra en ina nova fanestra e gia pon ins consultar il Dicziunari Rumantsch Grischun (DRG). Dapi passa in onn exista questa purschida en l’internet. E tuttina na desista strusch in abunent dal DRG sin palpiri.

Pli grev saja quai oz dentant da chattar novs abunents giuvens, conceda Carli Tomaschett. Dapi 15 onns sa reduceschia il dumber d’abunents mintg’onn in zichelin. Il manader dal DRG vesa pliras raschuns – sco per exempel:

  • Il dumber dals Rumantschs sa reducescha.
  • Blers abunents dal DRG vivan en la Bassa e lur uffants na cuntinuan betg cun la retscha.
  • Entras fusiuns da plaivs e vischnancas che avevan abunà il dicziunari perda il DRG abunents.

Diesch disditgas pervia da la vegliadetgna

L'onn passà hajan diesch abunents disditg il DRG, di Carli Tomaschett. La raschun n’era dentant betg la purschida online, mabain la vegliadetgna dals abunents.

Dal reminent: Dals var 490 abunents sa chattan 110 en l’exteriur. Il DRG trametta ils novs fascichels tranter auter a New York, Uppsala, Bucarest, Amsterdam, Hampshire, Barcelona e Copenhagen.

L’idioticon rumantsch – senza coronavirus

Quatter lexicons naziunals datti – in per mintga lingua. Il lexicon tudestg sa numna «Idiotikon», il rumantsch Dicziunari rumantsch grischun (DRG). Cun la lingua da scrittira rumantsch grischun n’ha quai da far nagut. Il cuntrari: Il dicziunari rimna ed explitgescha tuttas expressiuns idiomaticas e dialectalas rumantschas.

Diesch persunas – redacturas e redacturs, documentalists e bibliotecaras etc. - lavuran tar il DRG. Finanzià vegn il dicziunari entras la Confederaziun (87%), entras il chantun (9%) ed entras la vendita da fascichels, fotografias e publicaziuns.

Fin uss èn cumparids 14 toms che tractan ils bustabs A fin M. En il tom ch’è cumparì il 1968 chattan ins il pled «curuna» u «cruna». Sin quatter paginas èn explitgadas las differentas variantas e muntadas ch’il pled ha, tge scripturs rumantschs che han duvrà il pled ed ins intervegn che «aunc esser sin la cruna da sogn Carli» vul dir ch’in poppa u in pop na saja anc gnanc naschì.

Il pled «coronavirus» na chattan ins sa chapescha anc betg, damai ch’il virus e cun quai il pled n’existevan anc betg dal temp, cura ch’il tom è cumparì.

RTR actualitad 07:00

Artitgels legids il pli savens

Scrollar a sanestra Scrollar a dretga