Igl è la terza giada che Mario Cavigelli (PCD) daventa 2021 president da la regenza grischuna. Quai è dentant era ses ultim onn presidial: Suenter questa legislatura – pia suenter 12 onns – na dastga el betg candidar per in'ulteriura perioda d'uffizi.
Deputadas e deputads han demussà grond sustegn tar sia elecziun: 105 da 106 vuschs valaivlas è in fitg bun resultat. Quai mussa era il sguard en las elecziuns dals ultims onns.
PCD cun president e vicepresident
En roda sco vicepresident vegn Marcus Caduff (PCD). Per il Lumnezian èsi ina premiera, cunquai ch'el è pir dapi l'onn 2018 cusseglier guvernativ.
Che gist dus cristiandemocrats surpiglian presidi e vicepresidi è ina situaziun zunt speziala. Per l'ina perquai che la PCD è insumma represchentada cun duas persunas en la regenza e per l'autra era che Marcus Caduff vegn en roda. El ha numnadamain survegnì en las elecziuns dal 2018 dapli vuschs che Peter Peyer (PS).
