Siglir tar il cuntegn
Inhalt

Chantun Dumber da cunfinaris è prest sa dublegià

Ils davos 10 onns è il dumber da cunfinaris en il Grischun prest sa dublegià. Avant 10 onns eran quai anc radund 3'500 cunfinaris, oz èn quai prest 6'500. Radund 90% da quels derivan da l'Italia.

Lavurers sin il bajetg a Schlarigna.
Legenda: Lavurers sin il bajetg a Schlarigna. Keystone

Totalmain lavuran actualmain bunamain 6'500 cunfinaris en il Grischun. Il tipic cunfinari è da l'Italia, masculin, bun 40 onns vegls, lavura en l'Engiadin'Ota u en las valladas dal sid e quai en il sectur da construcziun ni en il turissem.

Radund 90% dals cunfinaris vegnan da l'Italia. Mo bun 5% da l'Austria, quels lavuran lura savens en l'Engiadina Bassa u en la Val Müstair e sulet bun 2% vegnan da la Germania. Qua datti singuls che vegnan en la Val dal Rain a lavurar.

Situaziun economica è il motiv

La raschun che uschè blers cunfinaris derivan da l'Italia è cunzunt la situaziun economica ch'è anc adina betg sa revegnida dal tut suenter la crisa da finanzas, quai declera Patrick Casanova, il manader da la partiziun da statistica dal chantun. Dentant cler sajan er las pajas pli autas ina raschun ch'ils Talians fan savens in lung viadi per vegnir a lavurar.

Cunfinaris na prendan betg davent lavur ad indigens

Dentant betg mo ils cunfinaris profiteschan, mabain er ils patruns. Quels èn savens visads vi sin ulteriurs lavurers. Quai perquai che la quota da dischoccupaziun è fitg bassa en il Grischun. Vul dir, ils blers indigens han gia lavur, i ha dentant anc plazzas che ston vegnir occupadas. Perquai na sappian ins er betg dir ch'ils cunfinaris prendian davent lavur ad indigens. Anzi, els gidian schizunt regiuns perifericas che han savens da cumbatter cun la depopulaziun ed han uschia er pli paucs lavurers. Uschia na sappian ins betg discurrer d'in effect negativ dals cunfinaris, manegia Patrick Casanova.

RR actualitad 12:00