Siglir tar il cuntegn

Header

cuntegn

Dumber da populaziun 2018 Populaziun grischuna è creschida levet

La populaziun grischuna è creschida per 491 persunas cumpareglià cun l'onn avant – sin passa 198'000 abitantas ed abitants. Quai è in augment da 0,25%.

In augment anc pli pitschen ch'il Grischun han sulet ils chantuns Giura, Glaruna ed Appenzell Dadora gì. Vitiers è la populaziun sa sminuida en il Tessin ed en il chantun da Neuchâtel. En l'entira Svizra è la populaziun creschida il 2018 per 0,7% sin 8'544'527 persunas.

audio
Populaziun grischuna è creschida levet
ord Novitads dals 27.08.2019.
laschar ir. Durada: 44 Secundas.

Differenzas regiunalas

En Grischun viva prest la mesadad da la populaziun en la regiun Plessur, ensemen cun la regiun Landquart ed Imboden sa concentrescha la gronda part da la populaziun vinavant sin il nord dal chantun. Creschida lev sur la media è la populaziun en las regiuns da Viamala e Moesa. L'Engiadina e la regiun Bernina han pers lev populaziun.

Legenda:
Dumber da la populaziun tenor regiun En las regiuns marcadas blau è la populaziun creschida. En las regiuns marcads cotschen è la populaziun sa reducida. Uffizi federal da statistica

Mesadad da populaziun viva en vischnancas grondas

La citad da Cuira ha dumbrà la fin dal 2018 35'378 abitants, 340 dapli che l'onn avant. Bun la mesadad da la populaziun grischuna viva en vischnancas cun dapli che 3'000 abitants. En las pli pitschnas 21 vischnancas cun pli pauc che 250 abitants vivan sulet 1% da la populaziun.

Creschientscha sulet tras immigraziun internaziunala

Cunquai ch'i ha dà l'onn passà 1'794 naschientschas e 1'789 mortoris, sa gulivescha il saldo da naschientschas en Grischun. En Svizra è il dumber cun in minus 284 dentant cler negativ. Tar la populaziun che deriva da l'ester è il dumber cun 289 dentant en il plus.

Damai che pli bleras persunas dal Grischun han bandunà l'onn passà il Grischun che quai ch'igl è vegnì vitiers glieud, è la populaziun grischuna be creschida entras l'immigraziun. A 3'542 persunas ch'èn vegnidas en Grischun stattan visavi 2'811 persunas ch'èn idas. 544 persunas en Grischun han survegnì l'onn passà il dretg da burgais svizzer.

RR novitads 09:00

Artitgels legids il pli savens