Siglir tar il cuntegn
cuntegn

Chantun Duri Campell vul defender ses sez

Il barometer in onn avant las elecziuns ha mussà che la PBD ha pers sustegn en Grischun. Sch'i fiss vegnì elegì quest'emna il cussegl naziunal, avess la Partida burgais-democratica anc 3,2% da las vuschs. Quai fiss in minus da radund 1% cumpareglià cun las elecziuns dal 2015.

Purtret da Duri Campell.
Legenda: Duri Campell vul defender il sez da la PBD en il cussegl naziunal. Keystone

Il Grischun è in dals lieus da tschep da la Partida burgais-democratica. Cun Duri Campell è er in cusseglier naziunal grischun commember dals burgais-democrats. Campell crai che la PBD vegn da tegnair quest sez en Grischun. Las cifras na fetschian betg plaschair, ma per el è cler: El vul defender ses sez il 2019.

Dir cumbat electoral

Duri Campell spetga ch'i vegn a dar in dir cumbat electoral. I dat partidas che vulan mantegnair lur sezs ed autras che vulan puspè turnar en il cussegl naziunal. L'Engiadinais è dentant pront per in dir cumbat electoral. Bain haja el l'entschatta gì difficultads da chattar ses plaz a Berna. En ils ultims trais onns haja el dentant chattà adina dapli plaschair vid la lavur.

Agricultura, turissem e relaziuns cun l'Europa

Uss vul Campell mussar anc pli fitg a la populaziun svizra e grischuna per tge ch'el s'engascha. El vul ina buna e saun'agricultura, el vul s'engaschar per il turissem ed en spezial era per ina buna relaziun cun l'Europa.

Cun ils temas numnads vul Duri Campell persvader la populaziun grischuna d'eleger el l'onn proxim per ina segunda giada en il cussegl naziunal. Ma il politicher da 55 onns è pertschert che quai na vegn betg simpel.

RR actualitad 07:00