Siglir tar il cuntegn

Chantun E-voting per il Grischun

En il chantun duai puspè daventar pussaivel da votar a moda electronica. La regenza grischuna ha tramess en consultaziun il sboz per ina revisiun parziala da la lescha davart ils dretgs politics.

Tastatura cun cedel da votar.
Legenda: A partir dal 2021 duain tut las vischnancas grischunas porscher la pussaivladad da vuschar a moda electronica. Keystone

La revisiun duai pussibilitar d'introducir l’uschenumnà «e-voting» sco terza pussaivladad per vuschar per tut ils votant e sin tut ils nivels statals.

L'introducziun concreta duai vegnir realisada en ils pass suandants:

  • adattar las basas giuridicas chantunalas fin la fin da l'onn 2017
  • cumprar il sistem dad e-voting fin la fin da l'onn 2018
  • preparar l'introducziun l'onn 2019
  • introducir l'e-voting en vischnancas da pilot sin il 1. da schaner 2020
  • introducir l'e-voting en tut las vischnancas sin il 1. da schaner 2021

En il rom d'in consorzi aveva il chantun Grischun gia dà la pussaivladad da vuschar a moda electronica tranter ils onns 2010 e 2015. Il consorzi è vegnì schlià la fin da l'onn 2015, suenter ch'il cussegl federal aveva scumandà als chantuns da duvrar il sistem dal consorzi per las elecziuns dal cussegl naziunal 2015.

Dapi lura ha la regenza confermà repetidamain, uschia er en il program da la regenza 2017–2020, ch'ella saja vinavant interessada d'introducir l'e-voting sut cundiziuns acceptablas.

Studis actuals demussan cleramain las aspectativas da pudair votar sin via electronica, spezialmain da las persunas cun dretg da votar pli giuvnas. La lescha duai entrar en vigur il prim da schaner 2020.

RR novitads 10:00