Siglir tar il cuntegn

Header

Grafica economia GR
Legenda: MAD
cuntegn

Economia grischuna Tgi profitescha e tgi patescha da corona

L’economia grischuna è stabila e tuttina en ina situaziun intscherta. Quai mussa ina retschertga tar 650 interpresas grischunas pertutgant las consequenzas da Covid-19.

Tut tenor branscha sa differenzieschia la situaziun dal tuttafatg, scrivan las organisaziuns d’economia dal Grischun che han fatg la retschertga:
Las branschas dad IT e da tecnica medicinala hajan profità da la crisa da corona. Biros da viadi ed organisaturs d’occurrenzas na sappian percunter betg co sa revegnir da la crisa.

Mintga terza interpresa grischuna quintia cun perditas da svieuta da passa 40% quest onn. Quai vala surtut per la gastronomia e la hotellaria. E: Malgrà lavur curta haja mintga dieschavla interpresa stuì relaschar persunal.

Las mesiras ch'il chantun e la Confederaziun hajan prendì per sustegnair l'economia hajan mussà effect. E quellas duain cuntinuar sche necessari, manegia ina maioritad dals dumandads.

En general saja l'economia grischuna vegnida bain tras la crisa e saja stabila, resumeschan las organisaziuns d’economia. Cundiziun è natiralmain che l’enviern na portia betg puspè restricziuns pervi da Covid-19.

Per surmuntar la crisa giavischan las interpresas dal stadi mesiras a lunga vista. Pia: Las interpresas giavischan che las cundiziuns da rama sa megliereschian en general enstagl da mesiras d’impuls a curta vista. Plinavant giavischan ils interprendiders grischuns ina communicaziun clera da chantun e Confederaziun.

Program d'impuls

Il chantun ha incumbensà las organisaziuns d'economia da sviluppar ideas e mesiras per in program d'impuls per far frunt a las consequenzas economicas da la pandemia da corona.

Funtauna da la retschertga

Textbox aufklappenTextbox zuklappen

Fatg la retschertga han las organisaziuns tetgalas da l'economia grischuna, quai en collavuraziun cun il Forum d'economia dal Grischun e l'Uniun d'impressaris dal Grischun. A la retschertga online èn 650 interpresas ord differentas branschas sa participadas il fanadur ed avust 2020.

RTR novitads 06:00

Artitgels legids il pli savens

Scrollar a sanestra Scrollar a dretga