Jöri Luzi, l'iniziant da l'iniziativa per be in linguatg ester en scola sa fa quitads: Tge capita uss, suenter che l'iniziativa ha fatg naufragi, cun ils uffants che han propi difficultads cun dus linguatgs esters en scola? Johannes Flury, president da la Lia Rumantscha, adversari da l'iniziativa ed anteriur rectur da la Scol'auta da pedagogia dal Grischun dat resposta: «En il Grischun datti la pussaivladad da laschar dispensar relativamain simpel uffants da l'instrucziun d'in linguatg ester u d'in auter rom nua ch'els èn surdumandads».
Las pli bleras dispensaziuns dal rom matematica
Er il minister d'educaziun partent, cusseglier guvernativ Martin Jäger fa attent sin questas pussaivladads ch'existian gia. Avant la dispensaziun datti però er anc la pussaivladad d'adattar la finamiras d'emprender. Quai vul dir ch'in uffant che ha difficultads na sto betg cuntanscher il medem sco la gronda part da la classa en in rom. En in linguatg fiss quai lura p. ex. emprender pli paucs pleds u betg far tants chapitels da grammatica. Martin Jäger agiunta qua però er anc ch'il pli savens na vegnian uffants betg dispensads da linguas mabain dal rom matematica. E tuttina nagin che veglia stritgar matematica or da l'urari.
RR actualitad 07:00