Tenor la Pro Infirmis è il dumber dad edifizis ch’èn construids tenor ils basegns da persunas cun impediments creschids ils ultims onns. Tuttina n'è la realisaziun anc betg cuntentaivla.
Be var la mesadad da las chasas e dals edifizis sa tegnan vi da las perscripziuns da fabrica adattadas per persunas cun impediments di Urs Mugwyler ch'è cussegliader da construcziun da la Pro Infirmis.
Sche las perscripziuns vegnan tegnidas en u betg dependa il mument fitg da las persunas responsablas en las vischnancas.
Scolaziun, sensibilisaziun e leschas
I detta blers architects, schefs da fabricas e patruns da construcziun tar las vischnancas che n'enconuschian betg las normas bain avunda. Perquai as stuess tenor la Pro Infirmis metter dapli paisa sin la scolaziun.
Il mument dependia ferm da las persunas che sajan responsablas schebain i vegnia bajegià tenor las normas u na.
Perquai vul la Pro Infirmis laschar elavurar leschas che prescrivan precis co i è da construir. La finamira da la Pro Infirmis è che almain 80% dals bajetgs sajan adattads a persunas cun impediments.
Exempels concrets
In edifizi ch’è ideal ed adattà per persunas cun impediments, saja l'edifizi dal Cussegl Grond a Cuira, di Roman Brazerol da la Pro Infirmis Grischun.
Ma i dat er bajetgs che na correspundan insumma betg al basegn d’ina persuna impedida. Qua menziuna Brazerol il bajetg da la Posta, gist dasper la citad veglia. Ina persuna cun sutga da rodas n'ha nagina schanza da vegnir en quest bajetg. Gia dapi blers onns procuria quest bajetg per discussiuns.
RR actualitad 07:00