Siglir tar il cuntegn

Header

Persuna penda si tavla cun si "Wegen Coronavirus bis auf weiteres geschlossen"
Legenda: Pervia da las restricziuns causa coronavirus èn firmas sfurzadas d'annunziar lavur curta u schizunt da relaschar collavuraturs. Keystone
cuntegn

Effect sin martgà da lavur Grischun: Quota da dischoccupaziun crescha sin 2%

Il martgà da lavur grischun senta las consequenzas da la crisa da corona. Il mars è il dumber da dischoccupads creschì per prest 900 persunas sin passa 2'100. Quai è ina quota da dischoccupaziun da 2%, sco l'Uffizi per industria, mastergn e lavur dal Grischun communitgescha.

5'000 interpresas cun lavur curta

En consequenza da la crisa da corona han 5'000 interpresas grischunas annunzià il mars lavur curta. Pertutgads sajan circa 45'000 collavuraturas e collavuraturs. Il favrer avevan anc tschintg firmas annunzià lavur curta. Cunzunt interpresas en il sectur da turissem sajan pertutgadas fermamain, scriva l'uffizi.

Dapli dischoccupads en Svizra

En Svizra è la quota schizunt creschida sin 2,9%, communitgescha il Secretariat da stadi per l'economia. En tut sajan stgars 136'000 persunas annunziadas senza lavur tar ils Centers regiunals per intermediaziun da lavur – quai è in augment da bunamain 18'000 persunas cumpareglià cun il mais avant. Il favrer era la quota anc tar 2,5%.

Sin nivel svizzer n'èn las cifras dal favrer e mars en connex cun lavur curta anc betg enconuschentas. Il Seco fa dentant ina nausch prognosa quai che pertutga lavur curta. I saja pussaivel che baingaliti mintga segund lavurant en Svizra è pertutgà.

RTR novitads 08:00