Elecziuns regenza grischuna – 7 candidats per 5 sezs

Sco ultima partida ha uss er la PPS nominà lur candidat per in sez en la regenza Grischuna. Walter Schlegel, il vicepresident da la PPS e cumandant da la Polizia chantunala candidescha per il Cussegl guvernativ.

vista sin la chasa da la regenza grischuna Bild in Lightbox öffnen.

Legenda da maletgs: Il zercladur 2018 decida il suveran tgenins tschintg umens che regian il Grischun. RTR, Flurina Cajochen

La partida populara svizra dal Grischun va en il cumbat electoral per la regenza grischuna cun Walter Schlegel. Schlegel è dapi il 2012 cumandant da la Polizia chantunala dal Grischun. Quai ha la PPS communitgà il glindesdi.

PLD cun Christian Rathgeb

La Partida liberaldemocratica grischuna ha uffizialmain nominà Christian Rathgeb sco candidat per la regenza grischuna. Quai han decis ils delegads a lur radunanza avant duas emnas a Cuira. La finamira saja ch’il cusseglier guvernativ da fin qua, Christian Rathgeb, vegnia elegì cun in fitg bun resultat, ha communitgà la PLD. Uschia renunzian ils Liberaldemocrats explicitamain da nominar dasper Rathgeb anc ina segunda persuna per las elecziuns da la regenza dal 2018.

La PCD cun Cavigelli e Caduff

La Partida cristiandemocratica ha nominà mez avust gist dus candidats per las elecziuns en la regenza. Il cusseglier guvernativ da fin qua Mario Cavigelli e il Sursilvan Marcus Caduff. Tenor atgnas indicaziuns vul la PCD defender il sez da Cavigelli e gudagnar enavos il sez pers il 1998.

PS cun Peter Peyer

La Partida socialdemocratica dal chantun ha fatg ina preselecziun per nominar in candidat uffizial. La finala ha Peter Peyer survegnì las bleras vuschs ed uschia decis las preselecziuns avant Andreas Thöny.

PBD cun Parolini e Felix

La Partida burgaisdemocratica va cun Jon Domenic Parolini e Andreas Felix en la cursa per la regenza grischuna. Per la PBD vali da defender il sez da Barbara Janom Steiner, che sto sa retrair pervi da la limita dal temp d’uffizi. I va er per defender il sez da Parolini.

PVL senza candidat

L’emprim aveva la Partida verd-liberala annunzià da vulair medemamain preschentar in candidat per la regenza grischuna. Alura aveva il president Gaudenz Bavier dentant communitgà ch’ì na dettia tuttina nagin candidat per la regenza e ch’els sa concentreschian sin las elecziuns en il Cussegl grond.

Las dunnas mancan

Las partidas ch'han preschentà fin uss candidats han sulettamain nominà umens e naginas dunnas. Uschia èsi gia uss quasi segir che nagina dunna vegn a succeder a Barbara Janom Steiner.

RR novitads 22:00