Siglir tar il cuntegn

Header

maletg da la sala dal Cussegl grond a Cuira
Legenda: Ils umens èn cleramain en la maioritad en il Cussegl grond actual. RTR
cuntegn

1 onn avant las elecziuns Finamira: Dapli dunnas en la politica grischuna

Nagina dunna en la regenza grischuna ed in tschintgavel dunnas en il Cussegl grond. Quai è la situaziun dapi las ultimas elecziuns – in maletg che ha procurà per blera critica. Tge han partidas fatg dapi lura? Tge sa mida per l'onn proxim? RTR ha dumandà suenter – in onn avant las elecziuns.

26 da totalmain 120 persunas ch'èn vegnidas elegidas tar las ultimas elecziuns en il Cussegl grond èn dunnas. En la regenza na datti insumma nagina dunna. Per far cler: I ha mancà candidatas e betg las vuschs.

Suenter la critica l'onn d'elecziuns 2018, duai quai sa midar en vista a las proximas elecziuns dals 15 da matg 2022. Almain giavischa quai il president dal Cussegl grond, Martin Wieland (PLD). En ses pled d'avertura da l'ultima sessiun ha el fatg l'appel: «Las proximas elecziuns porschan la pussaivladad d'augmentar il dumber da las dunnas en il parlament. Ed il pli aut grischun ha agiuntà:

Las schanzas per las dunnas n'eran anc mai uschè grondas sco oz.
Autur: Martin Wielandpresident dal Cussegl grond

Il nov sistem d'eleger il Cussegl grond, probablamain è quai in proporz dubel, porscha novas pussaivladads d'eleger dapli dunnas. Cun in proporz dubel dovran las partidas numnadamain candidatas e candidats en mintga circul electoral.

E tge fan las partidas per chattar dapli dunnas? Interessant è, las respostas dals umens sa differenzieschan da quellas da las dunnas.

Las respostas dals umens

Ina da las pli frequentas respostas che umens dattan sin la dumonda daco che la partida ha uschè paucas dunnas: «Ellas ston halt er vulair». Quai di per exempel Roman Hug, il president da la Partida populara dal Grischun. Dentant ins pudess gea far ad ellas il vulair pli simpel? Per exempel cun sustegnair la dunna dapli a chasa ch'ella haja dapli temp per far politica. Il schef dal la fracziun burgais-democratica en il Cussegl grond, Gian Michael, di tar quella proposta: «Nus na pudain betg dir als umens da star dapli a chasa per laschar far la dunna politica.»

audio
Tge din represchentants da partida?
03:19 min, Actualitad dals 12.05.2021.
laschar ir. Durada: 03:19 minutas.

Las propostas da las dunnas

Auter tuna quai tar las dunnas dal Cussegl grond ch'enconuschan ord atgna experientscha las sfidas d'entrar sco dunna en la politica. Valérie Favre Accola, deputada da la PPS di, che quai saja anc adina ina dumonda da la repartiziun da las lavurs: «Bleras dunnas han il perchasa, la lavur, uffants e lura ha la politica nagin plaz». Ella emprova perquai cun mintga chaschun da mussar ad autras dunnas interessadas co ella vegn da cumbinar famiglia e politica e dad uschia persvader dunnas da ir en la politica.

audio
Tge din/dovran las dunnas?
04:10 min, Actualitad dals 12.05.2021.
laschar ir. Durada: 04:10 minutas.

La deputada socialdemocratica, Silvia Hoffman ha manà blers onns il biro chantunal d'egualitad tranter um e dunna. Ella ha anc auters tips, co las partidas pudessan promover dapli candidatas per las proximas elecziuns. Per exempel engaschar duas ubain trais persunas che van propi a la tschertga, ubain envidar dunnas interessadas ad ina sessiun e lura gist er mussar, tge che capita davos las culissas da la politica. Anc meglier fiss, da cumenzar baud a svegliar l'interess per la politica. Quasi da sutensi. «Pia per exempel far en las vischnancas gruppas da duas, trais dunnas che pon per exempel organisar ina maisa da mezdi – i sto esser in project dal cor. E lura pon ins pass per pass far il project pli grond».

RTR actualitad 07:00

Artitgels legids il pli savens

Scrollar a sanestra Scrollar a dretga