Siglir tar il cuntegn

Header

cuntegn

Elecziuns 18 Al puls da las elecziuns e votaziuns

Resultats, reacziuns, analisas – davant e davos las culissas …

Resultats, rapports e reacziuns: Cun il Liveticker da RTR essas al current.

Il ticker è a fin

  • 19:04

    Quai fissi stà da nus per vus

    Dapli analisas e reacziuns tar la dumengia d'elecziuns e votaziuns sco era bler auter datti lura damaun puspè sin undas rumantschas, en il Telesguard ed era online sin rtr.ch u er sin Twitter e Facebook.

    Engraziel per l'attenziun ed ina bella saira.

    PS: reacziuns, resuns e critica gugent trametter a multimedia@rtr.ch

    Salids en il num da l'entir team online da RTR, Gion Gieri Flepp

    Gion Gieri Flepp al plaz da lavur.
    Legenda: Gion Gieri Flepp, il redactur dal liveticker da la dumengia d'elecziuns e votaziuns. RTR, Flavio Bundi
  • 18:45

    Uss LIVE al Radio Rumantsch

    Ils presidents da las partidas (dretg) Heinz Brand (PPS), Bruno Claus (PLD), Gaudenz Bavier (PVL), Gian Michael (PBD), Stefan Engler (PCD) e Philipp Wilhelm (PS) analiseschan la dumengia d'elecziuns.

    Ils presidents da las partidas a la maisa da discussiun en il studio.
    Legenda: Ils presidents da las partidas a la maisa da discussiun en il studio. RTR, Adrian Camartin
  • 18:39

    Ina dumengia cun enqual surpraisa – qua intginas da quellas:

    • Be 68 vuschs han fatg la differenza, uschia che Jon Domenic Parolini (PBD) è elegì e Walter Schlegel (PPS) betg.
    • Pervi da la pitschna differenza sto il chantun anc ina giada dumbrar las vuschs. Tar la chanzlia chantunala na quintan ins dentant betg cun midadas vi dal resultat.
    • A Flem n'è il president communal, Adrian Steiger, betg vegnì reelegì en il Cussegl grond. Persuenter ha la PBD ussa dus sezs cun ils novs Guido Casty ed Ursin Widmer.
    • La PPS na cuntanscha nagin sez en il cirquit da Glion.
    • En il cirquit da Razén gudogna la PCD ed occupa da nov 6 dals 7 sezs. La PLD perda ses sez, Angela Casanova-Maron n'è betg pli vegnida reelegida.
    • A Tavau perdan ils burgaisdemocrats gist dus sezs. Nov en il Cussegl grond per Tavau èn Valérie Favre Accola per la PPS e lura il president da la PS grischuna Philipp Wilhelm.
  • 18:01

    Il studio da radio è pront per la «runda d'elefants»

    A las 18:15 analiseschan ils presidents da partida ils resultats da questa dumengia d'elecziuns. Georgina Janki moderescha la discussiun.

    maisa radunda cun microfons e sutgas enturn
    Legenda: Il studio da radio è pront per la runda da discussiun tar la dumengia d'elecziuns. RTR, Hugo Schär
  • 17:49

    Baselgia evangelica dal Grischun survegn ina nova constituziun

    94% da las votantas e dals votants han ditg gea a la revisiun totala da la constituziun. Punct central da la revisiun è la collavuraziun da las plaivs. Quai cun la finamira ch’i dettia ina purschida pli varianta. Messa sin via era la revisiun vegnida gia avant 11 onns.

    Baselgia evangelica Son Martin a Cuira.
    Legenda: Baselgia evangelica Son Martin a Cuira. Keystone
  • 17:39

    Jon Domenic Parolini

    ha quintà ch'i vegnia stretg cun la reelecziun. Cunzunt er pervi da l'entira istorgia enturn il cartel en la branscha da construcziun.

  • 17:33

    Il Grischun ha elegì

    Regenza e Cussegl grond èn elegids - a las 17:25 en il Telesguard datti reacziuns ed analisas tar questa dumengia d'elecziuns.

    La nova regenza grischuna (da san.) Peter Peyer (PS), Marcus Caduff (PCD), Mario Cavigelli (PCD), Christian Rathgeb (PLD) e Jon Domenic Parolini (PBD)
    Legenda: La nova regenza grischuna (da san.) Peter Peyer (PS), Marcus Caduff (PCD), Mario Cavigelli (PCD), Christian Rathgeb (PLD) e Jon Domenic Parolini (PBD). RTR
  • 17:10

    «La gronda victura è la PCD ... gronda perdenta è la PPS»

    Il commentari dal schefredactur da RTR, Flavio Bundi. Per la PCD saja la strategia cun la cadidatura dubla sa cumprovada. La PPS, sco pli ferma partida, na saja er ils proxims 4 onns be per 68 vuschs puspè represchentada en la regenza.

    audio
    Commentari dal schefredactur
    ord Actualitad dals 10.06.2018. Maletg: RTR
    laschar ir. Durada: 1 minuta 15 Secundas.
  • 16:57

    Walter Schlegel

    che n'è per 68 vuschs betg vegnì elegì en la regenza è trumpà, ma accepta il resultat.

  • 16:44

    Cussegl grond – PBD perda, PS gudogna

    Tut ils 39 cirquits èn dumbrads or. Cumpareglià cun las ultimas elecziuns il 2014 perdan ils burgaisdemocrats ils pli blers sezs, ils socialdemocrats gudognan ils pli blers.

    En ils suandants cirquits dovri anc in segund scrutini:

    • Tusaun e Roveredo ston anc eleger ils suppleants
    • Schiers, Jenaz e Suot Tasna ston anc eleger mintgamai in deputà
    • La Lumnezia sto anc eleger in deputà. Probablamain Curdin Capeder che surpiglia il sez da Marcus Caduff perquai che lez è elegì en la regenza ed il medem mument anc en il Cussegl grond.
    La fermezza da las partidas en il Cussegl grond, suenter l'emprim scrutini.
    Legenda: La fermezza da las partidas en il Cussegl grond, suenter l'emprim scrutini. RTR
  • 16:24

    Peter Peyer, il nov elegì en la regenza ha adina gì in bun sentiment ...

  • 16:15

    Malögia – promoziun da cultura resta incumbensa regiunala

    La decisiun dad oz è fitg clera – votants e votantas da tut las 12 vischnancas han approvà la fatschenta. La finala sa resulta in gea da 83%. Fin l’onn passà era la promoziun regiunala da la cultura ina lezia dal Circul d’Engiadin’Ota. Sco d’enfin qua duain uss star a disposiziun maximalmain 150'000 francs ad onn.

  • 16:04

    Votaziuns naziunalas – resultats definitivs

    • 72,9% han ditg GEA a la lescha da gieus per daners.
    • 75,7% han ditg NA a l'iniziativa per il daner cumplain

    La participaziun è tenor la calculaziun approximativa da la SRG tar 34%.

  • 15:58

    Surses: Filip Dosch betg pli en il Cussegl grond

    Damai ch'il cirquit da Surses ha stuì dar giu in sez, ha in dals dus deputads stuì quintar da perder ses sez. E tutgà hai uss Filip Dosch da la PCD. El fa 38 vuschs damain che Gaby Thomann-Frank da la PLD. La dunna da Parsonz vegn elegida cun 255 vuschs.

    Filip Dosch
    Legenda: Filip Dosch sto dar giu ses sez en il Cussegl grond. ANR, Gion Nutegn Stgier
  • 15:42

    Christian Rathgeb na vul betg specular ...

    davart la repartiziun dals departaments, sa legra però dal meglier resultat dals set candidats per la regenza.

  • 15:30

    Marcus Caduff

    è elegì cun il terz meglier resultat sco nov commember da la regenza grischuna. En Lumnezia han las votantas ed ils votants però er elegì el sco lur represchentant en il Cussegl grond. Uschia surpiglia pli probabel Curdin Capeder sco suppleant il sez da Marcus Caduff en il parlament grischun.

    Da menziunar en connex cun ils deputads per la Lumnezia: Dapi che la Lumnezia ha be pli dus, n'ha Val sco part da la Lumnezia betg pli gì in sez en il Cussegl grond, er questa giada betg. Cura che la Lumnezia aveva anc trais deputads vegniva adina er in da Val elegì.

    audio
    Elecziuns 2018: Reacziun da Marcus Caduff
    ord Actualitad dals 10.06.2018.
    laschar ir. Durada: 2 minutas 48 Secundas.
  • 15:15

    Votaziuns naziunalas – GEA a la lescha da gieus per daners – NA a l'iniziativa per il daner cumplain

    L'iniziativa per il daner cumplain ha fatg naufragi pervi da la maioritad dals chantuns. Tenor la calculaziun approximativa da la SRG vegn quell'iniziativa sbittada cun 75% na. Il Grischun ha sbittà l'iniziativa cun 79,66%

    La lescha da gieus per daners para da vegnir acceptada cun la gronda maioritad da 72% gea. Il Grischun ha ditg gea cun 70,77%

  • 15:05

    Mario Cavigelli, reelegì en la regenza cun il segund meglier resultat è fitg cuntent

  • 14:59

    Linard Bardil surprais da ses resultat

  • 14:54

    Cussegl grond: PCD mantegna en la Cadi, PBD perda en ils 5 vitgs e PPS gudogna a Brusio

    René Epp, Gabriela Tomaschett-Berther, Diego Deplazes e Clemens Berther – tuts da la PCD – represchentan en l'avegnir la Cadi en il Cussegl grond. Betg tanschì hai per Francestg Cajacob.

    La Partida burgais-democratica perda dus da ses trais sezs d'enfin uss en il cirquit dals Tschintg Vitgs. Sulet Benjamin Hefti fa il pass en il Cussegl grond per la PBD. Mintgamai in dals dus sezs pers da la PBD, van als socialdemocrats ed a la Partida populara.

    Surpraisa a Brusio: Il candidat da la PS, Dario Monigatti, n'è betg pli vegnì elegì. Ses sez va a la PPS cun Pietro Della Cà.

Artitgels legids il pli savens