Siglir tar il cuntegn

Header

cuntegn

Elecziuns 18 Candidats da la PBD per il Cussegl grond èn da buna speranza

Il scandal en connex cun il cartel da construcziun ha gì consequenzas sin las elecziuns da regenza. Che la schleta glisch sin la PBD savess dentant er far pli grev la cursa sin in sezs na crajan candidatas e candidats.

Il candidat da la PBD Andreas Felix è sa retratgs il venderdi saira. L'affera da cartels avess uschiglio savì far donn a la PBD Grischuna. Las turbulenzas savessan dentant er bittar ina schleta glisch sin candidatas e candidats burgais-democrats per il Cussegl grond. En tut candideschan 33 candidatas e candidats per in sez. Actualmain è la PBD la terz gronda fracziun en il parlament cun 27 deputadas e deputads.

audio
Bunura: Tge influenza ha la demissiun da Felix per la PBD GR?
ord Actualitad dals 30.04.2018.
laschar ir. Durada: 2 minutas 3 Secundas.

Nagina tema - mabain anc pli gronda motivaziun

A chaschun da la radunanza da delegads da la PBD Svizra èn candidatas e candidats per il Cussegl grond dentant sa mussads plain speranza. Uschia di il deputà da Stussavgia Daniel Buchli ch'èl n'haja nagina tema ch'il scandal da cartels pudess far donn a la PBD ed uschia forsa sminuir sias schanzas da restar en il Cussegl grond. Anzi, el di che la partida ed ils candidats sa tegnian uss pir da dretg ensemen. E ch'el saja motivà anc pli fitg ch'avant.

Era la candidata da Bever Ladina Meyer, ch'è per l'emprima giada sin la glista, è persvadida che votantas e votants na chastieschan betg l'entira partida. La glieud realiseschia bain ch'il scandal da cartel e la PBD èn dua pèra chalzers.

Martin Aebli, il president dil Cussegl grond conceda che l'entira istorgia saja pauc empernaivla sis emnas avant las elecziuns. Tuttina è el da l'avis che votantas e votants na mettan betg tut las persunas da la PBD en in truclet. Vinavant manegia el ch'il pievel elegia persunalitads e betg exnum persunas tenor partidas.

Cas ston vegnì sclerids

Martin Aebli dentant er auters deputads pretendan transparenza ed in scleriment en detagl. I na sappia betg esser ch'i vegnia mo mussà cun il det sin exponents da lur partida. Las dimensiuns sajan bler pli grondas e partutgian segir e franc er persunas dad autras partidas, uschia Ladina Meyer.

RR actualitad 07:00

Artitgels legids il pli savens