En il Cussegl grond è la partida socialdemocratica cun ses 15 deputads savens en la minoritad. Tuttina èn quels 15 mandats, recaltgads avant 4 onns, il meglier resultat en l'istorgia da la PS grischuna. Era sch'ella è be la quart ferma forza en il Cussegl grond, influenzescha ella la politica e metta accents. Ella cuntanscha il pievel e vegn da mobilisar. Ella ha per exempel terrà las votaziuns davart gieus olimpics en il Grischun e sin palancà naziunal la refurma da la taglia sin interpresas.
La missiun, definida da la partida tar las elecziuns cirquitalas, da mantegnair il status quo, n'è betg la pli simpla, di il politolog Clau Dermont. Tant pli ch'ins ha chaus prominents che han demissiunà. Persunas che han onns a la lunga politisà en il parlament e sa fatg in num (Jon Pult, Peter Peyer, Christina Bucher, Johannes Pfenninger, Andreas Thöny). Interessant dastgass daventar il cumbat en il cirquit da Tavau. Là emprovan ils socialdemocrats da reconquistar il sez pers avant 4 onns. E quai cun il nov president da la PS Grischuna, Philipp Wilhelm.
RR actualitad 08.00