La partida verd-liberala sa concentrescha questa giada cumplainamain sin las elecziuns cirquitalas. L'emprima giada en sia istorgia anc giuvna desistan ils verd-liberals grischuns da nominar in candidat per la regenza. Percunter ha la partida nominà 5 candidatAs per il Cussegl grond. Vul ella sco proclamà cuntanscher fermezza da fracziun, ston tut ils nominads vegnir elegids ils 10 da zercladur.
Pulit illusoric manegia il politolog Clau Dermont. Speranzas sin in terz sez po la PVL far. Quai grazia al pli prominent en sias retschas. Josias Gasser vul turnar sin la tribuna politica. Suenter ch'el è stà 4 onns en il Cussegl naziunal e n'ha avant 3 onns betg dumagnà la reelecziun, vul el uss puspè prender plaz per sia partida en il parlament grischun. En il cirquit da Cuira cumbatta Josias Gasser per in dals desiderads 20 sezs.
RR actualitad 08.00