Quatter circuls han dad eleger anc ina giada: A Schiers e Jenaz en il Partenz, Suot Tasna en l'Engiadina ed en Lumnezia en Surselva datti il prim da fanadur in segund scrutini.
- A Jenaz ha ni il candidat da la PLD ni quel da la PBD cuntanschì il pli absolut. Els van domadus anc ina giada en il cumbat. Sch'il resultat resta sco tar l'emprim scrutini lu è il candidat da la PBD elegì.
- A Schiers èn dus da trais sezs vegnids occupads. Las terz-bleras vuschs ha il candidat da la PLD fatg. El candidescha segir anc ina giada. Il candidat da la PBD na sa dentant anc betg, sch'el candidescha. Là èsi pia probabel, ch'il sez va a la PLD.
- A Suot Tasna en l'Engiadina è il candidat da la PBD il ferm dals betg-elegids. Igl è da quintar, ch'el candideschia anc ina giada. Il candidat da la PLD che vegn gist suenter cun radund 60 vuschs distanza na sa dentant anc betg, sch'el candidescha anc ina giada.
En il Grischun vala dentant adina er: I vegn savens elegì chaus e betg partidas.
- En Lumnezia vegn er anc ina giada elegì: Là sto il sez da Marcus Caduff anc vegnir occupà – el ch'è vegni elegì en la regenza desista sa chapescha da ses sez en il Cussegl grond. Là dat quai dentant sulet candidats da la PCD, uschia che quel sez resta en mauns cristiandemocratics.
A Cuira pudessi pervi dad in'autra raschun dar in resultat piz a cup:
- A Cuira pudess la PCD anc gudagnar in ulteriur sez. Il candidat da la PCD è numnadamain mo per ina vusch betg vegnì elegì, uschia ch'i vegn dumbrà suenter ed il candidat da la PBD pudess anc perder il sez.
Nagin da quels scenaris mida dentant insatge vi da la fermezza da las fracziuns en il Cussegl grond. La PLD resta uschè u uschia la ferma, la PCD la segund ferma e la PBD la terz ferma.
RR actualitads 12:10