Suenter 20 onns emprova la Partida cristiandemocratica dal Grischun (PCD) da gudagnar enavos in segund sez en la regenza grischuna. Reussir duai quai cun Mario Cavigelli e Marcus Caduff. Glindesdi ha la partida lantschà sia campagna electorala che stat sut il motto «pronts per novas sfidas».
Dus umens, dus differents focus
Il focus per las novas sfidas è dentant different tar ils dus candidats. Uschia cumbatta Mario Cavigelli vinavant per cuntanscher finamiras en ses departament, il Departament da construcziun, traffic e selvicultura.
Finamiras centralas èn:
- ina colliaziun cun la periferia. La colliaziun na duai betg mo esser existenta, mabain er vegnir adattada a basegns dad oz. Per il mument sajan cunzunt la e-mobilitad, las vias entaifer ils vitgs ed il traffic betg motorisà temas principals
- in sistem da traffic public sin rodaglia e via che collia ils centers regiunals en ina mes'ura
- decentralisar las plazzas da lavur chantunalas
- s'engaschar en per in provediment d'energia segir e bunmartgà. Cun energia regenerabla ed indigena
- procurar per ina infrastructura che protegia la populaziun da catastrofas da la natira.
Caduff vul bandunar ses «da chasa» tematic
Marcus Caduff, ch'è sa profilà en ils secturs turissem, agricultura e sanadad metta ses focus dentant betg sin in da quels. Mabain sin furmaziun e cultura. Temas dal Departament d'educaziun, cultura e protecziun da l'ambient. Quai è il departament che vegn liber cun la demissiun dal socialdemocrat Martin Jäger. Il segund candidat vul:
- Procurar che la scola populara s'orientescha a sia incumbensa da basa: liger, scriver e far quints. Ed appellar als geniturs da promover la cumpetenza sociala da l'uffant. Er il sistem da promoziun integrativa vul el prender sut la marella.
- cuntanscher che tantas interpresas sco pussaivel scoleschan emprendists e crear las medemas premissas per scolas medias.
- promover la cultura populara e d'amaturs.
- purtar enavant la collavuraziun tranter turissem ed agricultura.
Sche il motto «pront» per nov vegn er ad esser il nov motto per la repartiziun dals sezs en la regenza grischuna decida il suveran ils 10 da zercladur.
RR novitads 14:00