Siglir tar il cuntegn

Header

cuntegn

Elecziuns 18: Mario Cavigelli Persunal: «Jau sun mintgatant memia exact»

Mario Cavigelli è in carstgaun da famiglia che giauda gugent il temp cun ses dus uffants. Tar la lavur sto dentant tut esser exact, là è el in «Bünzli», sco el di.

Mario Cavigelli è creschì si a Domat, ha dentant era ragischs en Surselva, el è burgais da Siat. A Domat ed a Cuira ha el fatg las scolas, avant ch'el è ì a studegiar giurisprudenza a la scol'auta da Son Gagl ed a l'universitad da Friburg. Silsuenter ha el lura lavurà sco advocat. La politica ha dentant sco giuvenot giugà ina impurtanta rolla: El è in dals fundaturs da la PCD giuvna dal Grischun ed è lura daventà suprastant a Domat e silsuenter deputà en il Cussegl grond. Il 2010 è el vegnì elegì sco cusseglier guvernativ.

Mario Cavigelli

Avrir la box Serrar la box

Lieu: Domat

Annada: 1965

Professiun: Manader dal departament da construcziun, traffic e selvicultura

Hobis: Viandar, ir cun skis, esser en la natira, tennis

Famiglia: Vaiv, dus uffants

audio
Bunura: In di cun Mario Cavigelli – ses mintgadi
ord Actualitad dals 14.05.2018.
laschar ir. Durada: 5 minutas 38 Secundas.

Detectiv u policist? Forsa meglier betg...

Sco buobet vuleva Mario Cavigelli – sco blers uffants – daventar detectiv u policist. Oz dentant smirveglia el da quels giavischs, quai giess numnadamain insumma betg a prà cun el. El saja plitost in analiticher, el saja in tip che giaja gugent a la tschertga da schliaziuns. Dentant pateschia el in zic dal fatg ch'el saja in tip fitg exact, cun ils pleds da Mario Cavigelli in «Bünzli». Sch'i manchia insanua ina comma en in text, lura saja anc ina giada da squitschar tut.

L'istorgia fascinescha

En sias vacanzas prenda Mario Cavigelli gugent patgific: Ensolver en ruaus, leger in zic, il pli gugent cudeschs istorics, per exempel sur dals Germans, mangiar bain e giudair la cumpagnia da ses uffants.

Artitgels legids il pli savens