Siglir tar il cuntegn

Header

cuntegn

Elecziuns 18 PBD cumbatta forsa tuttina per segund sez en la regenza

La Partida burgais-democratica dal Grischun ponderescha almain da nominar in segund candidat per la regenza grischuna. Quai rapporta la «NZZ am Sonntag».

Suenter la radunanza da delegads a Seewis saja la suprastanza da la PBD anc ina giada sesida ensemen. Tenor il manader dal cumbat electoral da la partida, Gian Michael, avess ina dunna las meglras schanzas. Nums concrets n’ha el betg tradì ad RTR.

La schanza è fitg pitschna, ma la speranza è qua.
Autur: Gian Michael Manader dal cumbat electoral PBD

Ils ultims dis sajan ids uschè svelt cun la demissiun dad Andreas Felix e la delegada ch'els n'hajan gnanc gì temp da seser ensemen e discutar la pussaivladad. Plinavant saja il temp fitg stretg enfin tar las elecziuns.

Focus sin Parolini

Suenter la decisiun dad Andreas Felix da betg candidar, aveva la PBD annunzià oriundamain da sa focussar sin la reelecziun da cusseglier guvernativ Jon Domenic Parolini. Chattar in'autra candidata u in auter candidat per la regenza en uschè curt temp, saja pauc realistic, aveva ditg Michael.

Crap da stgarpitsch per Felix è daventà l'affera da cartel en la branscha da construcziun en l'Engiadina. Il focus sin sia persuna e l’Uniun grischuna dals impressaris haja bittà ina nauscha glisch sin la PBD dal Grischun. Per prevegnir donns d'image saja el perquai sa retratg, uschia Andreas Felix.

RR novitads 07:00

Artitgels legids il pli savens