Creschì si è Peter Peyer a Landquart e Malans. Dapi 15 onns viva el dentant ensemen cun sia dunna e sias duas figlias a Trin. L'um da 52 onns ha gia lavurà en diversas branschas. Emprendì ha el mussader da scolina ed è stà l'emprim mussader da scolina masculin en il chantun Grischun. Dapi il 2009 è el secretari dal sindicat per il persunal da transport SEV a Cuira.
Il traffic public è adina tema tar Peyer
Sche adina pussaivel nizzegia Peter Peyer il traffic public – saja quai per ir da Trin a Cuira a lavurar u per ir a sesidas ch'el ha regularmain en la Bassa. Sin quels viadis haja el la pussaivladad da discurrer cun il persunal da transport. Uschia audia el tge che funcziunia e tge betg e possia duvrar in u l'auter da quels inputs per sia lavur da mintgadi, di Peyer.
Musica e la Sardegna dattan forza
Il sindicalist è dapi stgars 10 onns commember dal Chor Mischedau da Trin. Là giauda el d'ina vart il chant, da l'autra vart dentant er la cumpagnia – ed ina biera suenter l'emprova da chant tutga era tiers. Quai sajan ils muments nua ch'el possia tschentar giu e prender distanza da ses mintgadi da lavur.
Er vacanzas sin l'insla taliana Sardegna èn fitg impurtantas: Ensemen cun sia dunna, che ha vivì intgins onns a Sardegna, fa el regularmain vacanzas sin l'insla. La mar saja per el in lieu da forza.
RR actualitad 07:00+