Siglir tar il cuntegn

Header

cuntegn

Elecziuns 18: Walter Schlegel Persunal: «Da l'unifurma da polizia en quella da bike»

Il cumandant da la Polizia chantunala grischuna è ina persuna da la natira che giauda da far turas da velo e da viandar cun sia dunna e ses trais uffants.

Walter Schlegel è naschì e creschì si ses emprims onns d'uffanza en il Puschlav. Pli tard è la famiglia sa chasada a Cuira ed il 1980 lura a Trimmis, nua ch'el abitescha anc oz. Suenter la scola chantunala ha el cumenzà in studi sco inschigner. El ha dentant midà champ e studegià giurisprudenza a l'Universitad da Turitg. En il servetsch militar è el stà uffizier.

Walter Schlegel

Avrir la box Serrar la box

Lieu: Trimmis

Annada: 1962

Professiun: Cumandant da la Polizia chantunala GR

Hobis: Viandar, ir per bulieus, mountainbike, ir cun skis

Famiglia: Maridà e bab da trais uffants

Enavos en il chantun Grischun

Suenter il licenziat è Walter Schlegel turnà en il Grischun ed ha lavurà en differentas funcziuns tar il chantun. El è tranter auter stà schef da l'Uffizi chantunal da polizia, secretari dal Departament per l'economia publica e la finala – dapi il 2012 – cumandant da la Polizia chantunala grischuna. Dapi lura maina el bun 500 persunas.

Sper blera lavur da sesidas e coordinaziun è Schlegel er adina puspè en viadi - saja quai tar controllas da polizia u era tar scolaziuns dad aspirants.

audio
Bunura: In di cun Walter Schlegel – ses mintgadi
ord Actualitad dals 09.05.2018.
laschar ir. Durada: 5 minutas 19 Secundas.

La famiglia ed il sport – equiliber sper la lavur

Cun sia dunna ha Walter Schlegel trais uffants tranter 15 e 22 onns. Ensemen cun els fa el gugent sport, va a viandar, cun velo u er a guardar gieus dal Club da hockey da Tavau. L'entira famiglia saja fan dal HCD. Ed era la regiun enturn Tavau haja ina speziala muntada per la famiglia: Savens fetschian els là viandadas u giajan cun skis. Plinavant è Walter Schlegel in rimnabulieus passiunà.

RR actualitad 07:00+

Artitgels legids il pli savens